Делегаты делятся мнениями о Послании Президента

 

Ларыса МУКАМОЛАВА, галоўны рэдактар  газеты «ГС»:

— У Пасланні Прэзідэнта кожны знайшоў адказы на пытанні, якія яго хвалявалі. Была звернута ўвага на канцэпцыю нацыянальнай бяспекі, на захаванне гістарычнай памяці і данясенне праўды да маладога пакалення.

Як сказаў Кіраўнік дзяржавы, мір на зямлі немагчымы без гістарычнай памяці, а стварэнне – гэта пераем­насць гістарычнага шляху, гэта крок у будучыню. Прэзідэнт вельмі дакладна падмеціў, як скажаецца гісторыя ў нашых бліжэйшых суседзяў, калі нацыстаў шануюць як герояў, ладзяць шэс­ці ў іх гонар, зносяць помнікі савецкім воінам-вызваліцелям. Гэта тая самая недапушчальнасць гераізацыі жахаў, пра што мы сталі гаварыць усё часцей. Гераізаваць тых, хто спальваў Хатынь і сотні вёсак на тэрыторыі Беларусі, мы ніколі не паго­дзімся, падкрэс­ліў Аляксандр Лукашэнка.

Наша Сенненшчына, як і ўся Беларусь,  паліта крывёю савецкіх салдат і афіцэраў падчас Вялікай Айчыннай вайны. Вялікая трагедыя адбылася ў апошнія дні 1941 года на ўсходняй ускраіне г. Сянно, недалёка ад в. Казлоўка, калі было расстраляна 965 чалавек яўрэйскага насельніцтва. Зараз на гэтым месцы ўстаноўлены  памятны знак «Боль». У гады Вялікай Айчыннай вайны ў раёне было знішчана 124 вёскі.  За перыяд акупацыі фашысты спалілі 3 477 дамоў, вывезлі ў Германію 922 чалавекі. На франтах Вялікай Айчыннай загінулі 5 874 ураджэнцы Сенненшчыны, 1 066 чалавек — у партызанскіх атрадах і падполлі.

Па словах Прэзідэнта,  погляды і версіі, якія сёння навязва­юць нам, не павінны закрываць памяць пра мінулае. Мы павінны расказваць усяму свету  пра факты генацыду беларускага народа, тым самым выхоўваючы ў моладзі пачуццё патрыятыз­му. І ў гэтым плане вялікая роля адводзіцца нам, журна­лістам.

Супраць нашай краіны развязана інфармацыйная вайна. Не кожны прафесіянал сёння можа адрозніць праўду ад фэйкаў, якія апанавалі інфармацыйнае поле, адзначыў Прэзідэнт. У краіне ў бліжэйшы час узмоцняць прапаганду і агітацыю, каб не прайграць інфармацыйную вайну, якую вядуць супраць Мінска недружалюбныя сілы. Мы не можам прайграць гэту вайну, прайграем гэту інфармацыйную вайну — значыць, акунемся ў вайну сапраўдную, сказаў Прэзідэнт. Акцэнтаваў увагу Аляксандр Рыгоравіч і на падрыхтоўцы журналісцкіх кадраў. Новае папаўненне трэба расціць і вучыць на прыкладзе аксакалаў беларускай журналістыкі. Сёння патрэбны сапраўдныя байцы, якія  прафесійна скажуць сваё слова на інфармацыйным полі.

Мы жывем у вельмі няпросты перыяд, і кожны беларус павінен разумець, што толькі разам мы зможам супрацьстаяць любым пагрозам.  Словы «адзінства», «мы разам» былі і застаюцца для нас, жыхароў міралюбівай  краіны, сінонімамі патрыятызму. Гэта аснова для нашай агульнай будучыні.