Зима на Сенненщине началась ещё в ноябре

З пачатку зімы, па звестках Алены Барадзіной, начальніка раённай метэастанцыі, выпала 94 мм ападкаў пры норме 86. Яны назіраліся пераважна ў выглядзе снегу, іншы раз – імжы, дажджу.

— Упершыню за апошнія некалькі гадоў зіма парадавала жыхароў раёна марозным і снежным надвор’ем, — лічыць мая субяседніца.

 Зіма прыйшла на Сенненшчыну своечасова, што здарылася яшчэ 13 лістапада. Хаця звычайна гэта адбывалася пазней. Снег выпаў 23 лістапада. І не было такога дня, каб снежнае пакрыццё поўнасцю сыходзіла.

 Студзень, які традыцыйна вызначаецца нізкімі тэмпературамі, сёлета выдаўся даволі спакойным і не марозным. Сярэднясутачная тэмпература паветра склала – 5,8°С, што на 0,8 градуса ніжэй за кліматычную норму. Самым халодным днём можна назваць 24 студзеня, калі слупок тэрмометра апусціўся да – 19,8°С. Па даных метэастанцыі, за апошнія трыццаць гадоў самым халодным быў студзень 1987 года. Тады сярэднямесячная тэмпература паветра склала -16,9°С, што на 12°С ніжэй нормы. У тым жа годзе зафіксаваны і самыя марозныя ночы: 7 і 11 студзеня — – 32°С. А самы цёплы дзень быў 10 студзеня 2007 года. Тады слупок тэрмометра падняўся да адзнакі +10,6°С.

 Як сцвярджае Алена Аляксандраўна, сёлетняя зіма даволі спрыяльная для азімых культур. Такі вывад супрацоўнікі раённай метэастанцыі зрабілі, бо пастаянна сочаць за станам раслін, адбіраючы пробы.

— Снег лёг на мёрзлую зямлю. На сённяшні дзень тэмпература глебы на глыбіні, дзе знаходзіцца вузел кушчэння азімых зерневых на палях, за якімі ўстаноўлены кантроль, вышэй аптымальных значэнняў для перазімоўкі – каля 0°С, — адзначыла субяседніца. — Такая тэмпература і даволі высокае снежнае покрыва, вышыня якога складае 31 сантыметр, абараняе расліны. У той жа час, захаванне такой аграметэаралагічнай абстаноўкі да канца зімоўкі і неактыўнае развіццё вясенніх працэсаў можа выклікаць у азімых культур павышаны расход пажыўных рэчываў, назапашаных з восені. Пры захаванні працэсаў работнікі сельскай галіны будуць папярэджаны для правядзення работ па падкормцы культур.

 Цікава ведаць. Каб выдаваць аператыўную і поўную інфармацыю, на метэастанцыі яшчэ ў 2016 годзе была ўстаноўлена аўтаматызаваная метэаралагічная інфармацыйна-вымяральная сістэма (АМІВС). Два гады праводзіліся параўнальныя назіранні па старых прыборах і па даных новага абсталявання. З 2018 года АМІВС з’яўляецца асноўным сродкам вымярэння ўмоў надвор’я. Галоўныя метэаралагічныя параметры – тэмпература паветра, ціск — сістэма сама падае гідраметцэнтру кожныя тры гадзіны, тым самым паляпшаючы якасць прагнозаў надвор’я.

Прагноз

 Сярэднямесячная тэмпература паветра ў лютым чакаецца каля кліматычнай нормы — -5,3°С. Месячная колькасць ападкаў прагназуецца ў межах нормы – 39 мм, месцамі — больш сярэдніх шматгадовых значэнняў.

Ала ЯКАЎЛЕВА.