Юныя сенненцы пабывалі на Галоўнай ёлцы краіны

У Палацы Рэспублікі ў Мінску прайшла Галоўная ёлка краіны, на якой прысутнічаў Прэзідэнт Аляксандр Лукашэнка.

 Мерапрыемства сабрала больш за дзве тысячы хлопчыкаў і дзяўчынак з усей Беларусі: пераможцаў прадметных алімпіяд і творчых конкурсаў, выдатнікаў вучобы, дзяцей са шматдзетных сем’яў і тых, што па розных абставінах засталіся без бацькоў.

 На Галоўную ёлку ў сталіцу патрапілі і тры юныя нашы землякі.

 Такі гонар выпаў Канстанціну Паразенку, вучню 6 класса Ходцаўскай ДССШ. Хлопец з’яўляецца пераможцам раённых фестываляў дзіцячага мастацтва «Ранішняя зорка» і міжкультурных камунікацый, удзельнікам кастынгу рэспубліканскага праекта «Талент краіны», прызёрам раённага этапу прадметнай алімпіяды па беларускай мове.

 На свяце пабываў і Мікіта Сухарукаў з Сенненскай школы-інтэрната. Сямікласнік добра вучыцца, прымае актыўны ўдзел у грамадскім жыцці школы. У раённым фестывалі «Ранішняя зорка» заняў першае месца.

 Упершыню на рэспубліканскім ранішніку таксама быў і Максім Жыгалаў, вучань Яноўскай ДСБШ, васьмікласнік са шматдзетнай сям’і, прызёр раённых этапаў конкурсаў «Выратавальнікі вачыма дзяцей», «Мая чароўная Беларусь».

 А ў Віцебску прайшоў навагодні баль з удзелам старшыні аблвыканкама Мікалая Шарснёва. На прадстаўленне ездзілі школьнікі і з нашага раёна. Гэта былі вучні 3-8 класаў, усяго 25 чалавек.

 Ала ЯКАЎЛЕВА.