Служба охраны отметила 67-летие со дня своего создания

Граматай упраўлення Следчага камітэта Рэспублікі Беларусь па Віцебскай вобласці адзначана праца Алега Дзяшкевіча, начальніка Сенненскага аддзела Дэпартамента аховы МУС.

 

Гэта ўзнагарода – вынік працы ўсяго аддзела, не хавае Алег Віктаравіч. “Прыемна, што нашу работу станоўча ацэньваюць нашы калегі, супрацоўнікі сумежнага сілавога ведамства. Бо сумесна з іншымі праваахоўнымі органамі і дзяржаўнымі структурамі мы маем магчымасць найбольш якасна выконваць свае прафесійныя задачы”, — адзначыў ён.

 На днях служба аховы адсвяткавала 67-годдзе з дня свайго стварэння. Выдатная нагода, каб сабрацца разам, падвесці вынікі працы.

 Сёння раённы аддзел аховы — гэта мабільная, тэхнічна аснашчаная і добра ўзброенная служба. Пад аховай супрацоўнікаў аддзела знаходзіцца 208 аб’ектаў. Днём і ноччу на варце дзяржаўнай, кааператыўнай і прываттнай уласнасці стаяць 106 чалавек, з іх 37 супрацоўнікаў атэставанага складу і 62 спецыялісты вартавой аховы.

 За 10 месяцаў 2019 года супрацоўнікамі аддзела сумесна з іх калегамі з РАУС было раскрыта 8 крымінальных спраў, у тым ліку 6 крадзяжоў. У двух выпадках устанавіць злачынцаў дапамог службовы сабака. Ва ўсіх сітуацыях прадстаўнікі праваахоўных органаў дзейнічалі аператыўна, прафесійна, з веданнем справы, абапіраючыся на вопыт сваіх старэйшых калег, а таксама тых, хто знаходзіўся ля вытокаў службы і зрабіў свой унёсак у яе развіццё, станаўленне калектыву.

 У розны час узначальвалі аддзел Пётр Стычынскі, Аляксандр Яўпак, Аляксандр Мацуганаў. Яны таксама прысутнічалі на мерапрыемстве, віншавалі сваіх былых калег са святам. Маладому пакаленню зычылі з гонарам выконваць свой службовы абавязак.

 Шмат цёплых слоў было адрасавана супрацоўнікам, якія адзначаны за поспехі ў службе. Грашовыя прэміі ад Віцебскага абласнога ўпраўлення Дэпартамента аховы МУС атрымалі вартаўнікі Уладзімір Скакун і Аляксандр Старавойтаў. Падзякі ад кіраўнікоў абласнога ўпраўлення і раённага аддзела ўнутраных спраў атрымалі прапаршчыкі Кірыл Віхоця і Вадзім Каранеўскі, старшы сяржант Уладзімір Кухтаў, малодшы сяржант Максім Архіпаў.

Юбілейны медаль “75 гадоў вызвалення ад нямецка-фашысцкіх захопнікаў” Уладзіміру Цюцюнову, маёру міліцыі, уручыў ваенны камісар раёна падпалкоўнік Дзмітрый Ермакоў.

 Павіншавалі са святам супрацоўнікаў аддзела і артысты раённага Цэнтра культуры і народнай творчасці, арганізаваўшы ў сценах Сенненскага аддзела аховы канцэрт, у час якога прагучала шмат добрых музычных кампазіцый.

Ала ЯКАЎЛЕВА.

Фота прадастаўлена Сенненскім аддзелам Дэпартамента аховы МУС.