Конкурс на лучшую подготовку административных зданий к праздникам прошел в Сенненском районе

Напярэдадні Новага года старшыня райвыканкама штогод падпісвае распараджэнне аб правядзенні ў раёне конкурса на лепшую падрыхтоўку да свята адміністрацыйных будынкаў і вытворчых тэрыторый арганізацый і ўстаноў. Асаблівая ўвага заўжды звяртаецца на райцэнтр.

Вынікі сёлетняга конкурсу не прынеслі вялікіх сюрпрызаў. Як і летась першае месца прысуджана Сенненскаму раёну газазабеспячэння. Тэрыторыя прадпрыемства, адміністрацыйны будынак да свята зазіхацелі яркімі фарбамі, у іх з’явіліся новыя адценні, якія яшчэ больш падкрэслілі агульную канцэпцыю развіцця арганізацый, ў аснове якой строгасць і дакладнасць.

Ажно тром арганізацыям – АТП №20, раённай ветлячэбніцы і ПМС — падзячныя пісьмы за подпісам Васілія Чарадніка ўручаны за 2-ое месца. Адзначаны грунтоўны задзел па добраўпарадкаванні тэрыторыі, добры густ пры выкарыстанні ілюмінацыі для падсветкі адміністрацыйнага будынка аўтапрадпрыемства. Меліяратары, каб надаць навагодняга каларыту абышліся мінімальнымі фінансавымі затратамі, выкарыстаўшы творчыя таленты сваіх спецыялістаў, у тым ліку маладых, якія расфарбавалі ў навагоднім стылі вокны будынка.

Трэцяе месца – у ДРБУ 146 і цэха “Сенненскі” Аршанскага МК. Прэтэндаваць на больш высокае дарожнікам не дазволіў рамонт, які працягваецца ўнутры адміністрацыйнага будынка. А вось у перапрацоўшчыкаў сельгаспрадукцыі адзначаны змены да лепшага.

Старшыня райвыканкама падзякаваў і ўсім астатнім калектывам і ўстановам, якія прынялі ўдзел у конкурсе, які, на яго думку, дапамагае згуртаваць людзей, праявіць іх таленты.

Перадсвяточныя конкурсы праведзены таксама ва ўсіх сельсаветах, медыцынскіх установах, школах, райспажыўтаварыстве, іншых сферах.

Аляксандр ІЎЕЎ.

Фота аўтара.