ТУРЫСТЫЧНАЯ БУЛЬБА СМАЧНЕЙ ЗА ЎСЁ

Гэта вам пацвердзяць усе, без выключэння, удзельнікі раённага турыстычнага злёту сярод школьнікаў, што прайшоў у апошнія майскія дні.

Мерапрыемства штогод арганізуецца аддзелам адукацыі, спорту і турызму райвыканкама ў рамках школьнай спартакіяды. Насельнікамі палатачнага гарадка, што размясціўся ў маляўнічым сасновым лесе паблізу в.Навасёлкі Ходцаўскага сельсавета, сталі каманды з 12 школ раёна.
Замест ложка — спальны мяшок, замест газавай пліты — вогнішча, замест тэлевізара — песні пад гітару… У такіх спартанскіх умовах падлеткам і суправаджаючым іх педагогам давялося жыць некалькі дзён. Праўда, сумаваць па здабытках цывілізацыі юным турыстам не было калі. Кожны дзень распісаны па хвілінах. У праграме турзлёту — спаборніцтвы па турыстычна-прыкладным шматбор’і, спартыўным арыентаванні, конкурсы сценгазет і візітовак каманд, юных краязнаўцаў, на лепшую арганізацыю турыстычнага быту. Варта адзначыць, што да афармлення тэрыторыі каманды падышлі крэатыўна. Да прыкладу, Ходцаўская школа ператварыла свой бівак у сялянскі падворак. Не скупіліся каманды на каляровыя флажкі, стужкі, рознага кшталту інсталяцыі.
Падтрымаць школьнікаў перад стартам у палатачны лагер завітала намеснік старшыні райвыканкама Зоя Фаміна. У сваім вітальным звароце яна пажадала ўдзельнікам годна трымаць званне турыста-сенненца.
На правілы бяспекі ў лесе скіравалі ўвагу юных сенненцаў прадстаўнікі службаў спецыяльнага прызначэння — начальнік інспекцыі па справах непаўналетніх РАУС Вольга Хацько і начальнік райаддзела па надзвычайных сітуацыях Аляксей Грынжэўскі.
Пераможцы ў дзвюх узроставых групах прадставяць раён у наступным годзе на абласным турзлёце. Як адзначыла Ірына Грабнёва, метадыст вучэбна-метадычнага кабінета аддзела адукацыі, спорту і турызму райвыканкама, сенненскія школьнікі дэманструюць неблагую турысцкую падрыхтоўку. Так, сёлета на абласных спаборніцтвах пераможцы леташняга раённага турзлёту — каманды Беліцкай і Багданаўскай школ — занялі 7 месца з 14, саступіўшы прадстаўнікам устаноў адукацыі, дзе створаны і дзейнічаюць цэнтры турызму. Беліцкая школа пацвердзіла сваё лідарства і на гэты раз. Другое месца па выніках раённага турзлёту — у Багушэўскай СШ № 1, трэцяе — у каманды СШ № 1 г. Сянно.
Вольга БАНДАРЭВІЧ.