АНАСТАСІЯ ЛІСОЎСКАЯ — ТВОРЧЫ, ПАЗІТЫЎНЫ ЧАЛАВЕК

За шэсць гадоў існавання аддзялення дзённага знаходжання для інвалідаў ТЦСАН, многія маладыя людзі, якія наведваюць яго, змаглі праявіць сябе ў розных відах дэкаратыўна-прыкладной творчасці.

Сапраўдныя мастацкія цуды стварае, напрыклад, Анастасія Лісоўская. Ад карцін, вышытых рукамі майстрыхі, цяжка адвесці вочы. Азы вышыўкі дзяўчына пераняла ад бабулі. Потым, калі вучылася ў школе, працягвала ўдаскальвацца ў гэтай справе і дасягнула значных поспехаў. У мінулым годзе ў раённым гісторыка-краязнаўчым музеі была арганізавана персанальная выстава Анастасіі Лісоўскай, дзе ўсе жадаючыя маглі палюбавацца яе вышыванымі карцінамі.
Але таленавіты чалавек не можа быць таленавітым у чымсьці адным. Творчасць Анастасіі — яскравы прыклад гэтаму. Удаюцца ёй і работы з бісера (бранзалеты, кулоны і іншыя). А шые Насця проста прафесійна: раней працавала швачкай на адным з віцебскіх прадпрыемстваў. У аддзяленні дзяўчына занята ў вытворчых майстэрнях «Крэатыўны падарунак» і «Майстрыха», дзе рэчы вырабляюць на продаж.
«Наша Насця — майстрыха на ўсе рукі. Да таго ж яна вельмі творчая асоба, добры, спагадлівы і адказны чалавек, любіць дзяцей, добрая гаспадыня»,— гаворыць пра дзяўчыну загадчыца аддзялення дзённага знаходжання Таццяна Манкевіч.
Прыкладам для пераймання могуць служыць і адносіны Анастасіі да свайго здароўя. Акрамя таго, што яна займаецца на трэнажорах у аддзяленні, прыхільніца здаровага ладу жыцця з’яўляецца актыўнай удзельніцай фітнес-групы, заняткі ў якой падтрымліваюць не толькі фізічнае здароўе, але і даюць зарад добрага настрою і пазітыўных адносін да навакольнага свету. А гэта вельмі патрэбна кожнаму чалавеку, лічыць Анастасія Лісоўская.
Таццяна Буракова.
На здымку: наведвальніца аддзялення дзённага наведвання Анастасія Лісоўская.