Тема недели

Тэма тыдня: Весці сваю справу ў Беларусі стане прасцей

 Праверкі прадпрымальнікаў будуць значна скарочаны, а вядзенне сваёй справы стане максімальна простым. На гэта накіраваны пакет дакументаў па паляпшэнні ўмоў вядзення бізнесу, прыняцце якога чакаецца ў самы бліжэйшы час.

Дакумент па лібералізацыі ў эканоміцы

 Ключавы дакумент па лібералізацыі ў эканоміцы Беларусі — праект дэкрэта «Аб развіцці прадпрымальніцтва» вынесены на разгляд Прэзідэнта Беларусі Аляксандра Лукашэнкі ў час рабочай сустрэчы з першым віцэ-прэм’ерам Васілём Мацюшэўскім 26 верасня.

 Акрамя праекта дэкрэта, увазе кіраўніка дзяржавы таксама прадстаўлены праект указа, накіраваны на ўдасканаленне парадку ліцэнзавання.

 У цэлым праект дэкрэта з’яўляецца ключавым з падрыхтаванага пакета дакументаў і прадугледжвае кардынальнае змяненне механізмаў узаемадзеяння дзяржавы і бізнесу. Мінімізуецца ўмяшанне дзяржавы ў работу суб’ектаў гаспадарання, узмацняюцца механізмы самарэгулявання бізнесу і яго адказнасць за сваю дзейнасць перад грамадствам пры захаванні неабходнага ўзроўню кантролю з боку дзяржавы.

 Акрамя ўжо названых норм плануецца ўвядзенне паведамляльнага парадку ажыццяўлення асобных найбольш распаўсюджаных відаў эканамічнай дзейнасці. У адпаведны пералік увойдуць бытавыя, турыстычныя паслугі, дзейнасць у сферы гандлю і грамадскага харчавання, перавозак пасажыраў і багажу, вытворчасць сельгаспрадукцыі, будматэрыялаў і іншая дзейнасць. Паводле даных Міністэрства эканомікі, менавіта ў гэтых сферах сканцэнтравана каля 95% малога і сярэдняга бізнесу.

Удасканаленне парадку ліцэнзавання

 З улікам прынцыпу, у адпаведнасці з якім ліцэнзаванню падлягаюць толькі тыя віды дзейнасці, ажыццяўленне якіх спалучана непасрэдна з наяўнасцю пагроз нанясення шкоды дзяржаўным і грамадскім інтарэсам, навакольнаму асяроддзю, жыццю, здароўю, правам і законным інтарэсам грамадзян, праектам указа прадугледжваецца адмена 3 з 36 ліцэнзуемых цяпер відаў дзейнасці і 20 работ, паслуг, што складаюць віды дзейнасці.

 У прыватнасці, суб’ектам гаспадарання не спатрэбіцца атрыманне ліцэнзіі пры ажыццяўленні аўтамабільных перавозак пасажыраў (за выключэннем міжнародных), паліграфічнай дзейнасці, дзейнасці па аказанні псіхалагічнай дапамогі, а таксама звязанай з аказаннем юрыдычных паслуг (за выключэннем рыэлтарскіх), кантролем радыеактыўнага забруджвання, аховай юрыдычнай асобай сваіх работнікаў і маёмасці, што належыць ёй.

 Прадугледжана, што з 1 ліпеня 2018 года выдача ліцэнзій будзе ажыццяўляцца выключна ў электронным выглядзе. Тым самым адмяняецца папяровая форма ліцэнзіі. Праектам указа прадугледжваецца фарміраванне і вядзенне адзінага рэестра ліцэнзій, які змяшчае даныя аб выдадзеных ліцэнзіях, унясенні ў іх змяненняў.

Інстытут падатковых кансультантаў

 Прэзідэнт Беларусі Аляксандр Лукашэнка падпісаў указ № 338 «Аб падатковым кансультаванні», які ўкараняе ў краіне прафесійны інстытут пасрэднікаў паміж бізнесам і падатковымі органамі.

 Інстытут падатковых кансультантаў ствараецца ў Беларусі з улікам станоўчага замежнага вопыту. Правам аказання такіх паслуг надзяляюцца індывідуальныя прадпрымальнікі і камерцыйныя арганізацыі, якія маюць у сваім штаце не менш за аднаго падатковага кансультанта.

Развіццё гандлю, грамадскага харчавання і бытавых паслуг у вёсцы і ў малых гарадах

 Прэзідэнт Беларусі Аляксандр Лукашэнка 22 верасня падпісаў указ нумар 345 «Аб развіцці гандлю, грамадскага харчавання і бытавога абслугоўвання».

 Дакумент прадугледжвае магчымасць устанаўлення на асобных тэрыторыях асаблівага рэжыму падаткаабкладання ў сферы гандлю, грамадскага харчавання і бытавога абслугоўвання з выплатай падатку на прыбытак для прадпрыемстваў у памеры 6% і адзінага падатку для індывідуальных прадпрымальнікаў у памеры адной базавай велічыні, а таксама іншых спрошчаных умоў ажыццяўлення гэтых відаў дзейнасці.

Менш праверак і штрафы для «кантралёраў»

 Старшыня Камітэта дзяржаўнага кантролю Леанід Анфімаў пасля сустрэчы з кіраўніком дзяржавы падрабязна расказаў журналістам аб галоўных падыходах і навацыях праекта ўказа «Аб мерах па ўдасканаленні кантрольнай (нагляднай) дзейнасці».

 Паводле яго слоў, дакумент накіраваны на ўдасканаленне кантрольнай дзейнасці, лібералізацыю ўмоў вядзення бізнесу і адыход ад пільнага кантролю.

 Адно з самых важных новаўвядзенняў — пазбаўленне «кантралёраў» магчымасці прыпыняць дзейнасць прадпрыемстваў. Рашэнне, спыняць работу кампаніі ці не, будзе прымаць выключна яе кіраўнік на падставе рэкамендацый правяраючых. Аднак за свае дзеянні ён будзе несці ўсю адказнасць.

 Плануецца, што дакумент будзе падпісаны да 1 кастрычніка і ўступіць у сілу з пачатку 2018 года.