У Нямойтаўскай школе Сенненскага раёна выбіралі лепшага дэкламатара вершаў
“Голасам душы і сэрца” – пад такой назвай у Нямойтаўскай ДССШ прайшоў конкурс-свята на лепшага чытальніка вершаў, прысвечаны Году кнігі. У конкурсе прымалі ўдзел вучні 1-11 класаў, якія чыталі вершы Н. Гілевіча, Ю. Свіркі, П.Броўкі, М. Танка, Ф. Багушэвіча, Я. Янішчыц, А. Вярцінскага і іншых паэтаў беларускай літаратуры.
Напачатку быў зроблены кароткі агляд жыццёвага і творчага шляху паэтаў, расказана пра асноўныя мастацкія вобразы, паказаны адметныя рысы і характэрныя асаблівасці беларускай паэзіі, яе значэнне ў жыцці чалавека. . Таксама была прадстаўлена выстава зборнікаў паэтаў Беларусі.
Журы ацэньвала выступленні вучняў па такіх крытэрыях, як артыстызм, ступень эмацыянальнага ўздзеяння, выразнасць чытання. Пераможцы вызначаліся ў трох узроставых катэгорыях. Лепшымі чытальнікамі журы прызнала Аляксея Махрова (2 клас), Карыну Курс (3 клас), Алену Кудзян (6 клас), Анастасію Сіднёву (7 клас), Ганну Пяткевіч (9 клас) і Кацярыну Гарадзецкую (11 клас). Вучні былі ўзнагароджаны граматамі і заахвочаны выдатнымі адзнакамі.
Ганна ПЯТКЕВІЧ,
вучаніца 9 класа Нямойтаўскай ДССШ.