Крымінальная хроніка Сенненшчыны
У крадзяжы выкрыты адказныя работнікі. што далей?
Ад дырэктара ААТ «Пурплева» паступіла заява, што ў ноч на 23 сакавіка бягучага года з малочнатаварнай фермы Барок знікла тры каровы. Раённым аддзелам Следчага камітэта ўзбуджана крымінальная справа. Урон склаў 19 мільёнаў рублёў.
У ходзе аператыўна-вышуковых мерапрыемстваў было ўстаноўлена — крадзеж буйной рагатай жывёлы ўчынілі ветэрынарны фельчар і былы ветэрынарны ўрач ААТ «Пурплева».
Шліфавальнай машыне прырабілі ногі
Галоўны энергетык КУСГП імя Данукалава паведаміў у РАУС, што ў ноч на 24 сакавіка гэтага года з тэрыторыі мехдвара, размешчанага ў в. Полымя, скралі вуглавую шліфавальную машынку.
Насіллю ў сям’і — не!
26 сакавіка па матэрыялах праверкі УІМ узбуджана крымінальная справа па арт.154 ч.1 Крымінальнага кодэкса ў адносінах да непрацуючага жыхара вёскі Камарова, які сістэматычна на працягу года збіваў сваю жонку.
РАУС просіць усіх грамадзян не быць раўнадушнымі да падобных фактаў і паведамляць аб іх у міліцыю, каб з малой бяды не разыгралася трагедыя.
У хату праз акно
30 сакавіка ўзбуджана крымінальная справа згодна з ч.2 арт.205 Крымінальнага кодэкса ў адносінах да жыхара вёскі Кічына, работніка ДЛГУ «Багушэўскі лясгас», які ноччу, разбіўшы шкло ў акне, залез у хату мясцовага жыхара. Здабычай для зладзея сталі прадукты харчавання.
У той жа дзень, на той жа падставе, узбуджана крымінальная справа ў адносінах да непрацуючага жыхара вёскі Забараўе. У перыяд часу са снежня 2011 года па 30 сакавіка 2012 года з дома аднавяскоўкі ён выкраў маёмасць на суму 650 тыс.рублёў.
Чужыя тут не ходзяць
31 сакавіка ў РАУС паступіла паведамленне ад матэрыяльна адказнай асобы ААТ «Ульянавічы». Жанчына выявіла, што са склада, які знаходзіцца ў вёсцы Ульянавічы, у ноч з 30 на 31 сакавіка ўкрадзены камбікорм.
Падчас праверкі было ўстаноўлена, што крадзеж здзейснілі работнікі акцыянернага таварыства, адзін з якіх працуе вартаўніком.
Колькі можна гаварыць?
3 красавіка ў аддзел унутраных спраў райвыканкама звярнуўся дырэктар ААТ «Какоўчына» і паведаміў, што ў перыяд часу з 2 па 3 красавіка з зернесушылкі ў вёсцы Міцюкова выкрадзены электрарухавікі і металічныя рашоткі для прасявання зерня. Урон устанаўліваецца. Праводзіцца праверка.
Між тым, аб неабходнасці дэмантажу электрарухавікоў з зернесушыльных комплексаў на зімовы перыяд гаварылася не адзін раз. У прыватнасці, усім кіраўнікам сельгасарганізацый з РАУС накіроўваліся адпаведныя пісьмы. Раённы выканаўчы камітэт прымаў спецыяльныя рашэнні…
Хто цяпер кампенсуе нанесены дзяржаве ўрон? Дзеянні кіраўніка гаспадаркі інакш як халатнасць не назавеш.