На Сенненшчыне прайшлі зажынкі
Абрад, прызваны ўславіць хлебароба, улагодзіць сілы прыроды, правялі артысты народнага ансамбля «Вечарынка» раённага метадычнага цэнтра аддзела культуры райвыканкама і ўдзельнікі мастацкай самадзейнасці Багданаўскага СК. Яны выканалі велічальныя абрадавыя песні, уручылі першы сноп збожжа, нажаты сярпом, кіраўніцтву раёна і гаспадаркі. На шчырую працу механізатараў благаславіў, асвяціў хлебную ніву, камбайны памочнік благачыннага Сенненскай акругі святар Дзмітрый Фёдараў.
А тым часам адзін з камбайнаў ажыў і рушыў да збажыны. Ужо праз некаторы час з яго бункера зерне новага ўраджаю паплыло ў кузаў аўтамашыны. Яшчэ праз імгненне лепшы па выніках мінулагодняга жніва камбайнер ААТ «Сенненскі райаграсервіс» Сяргей Кухто паднёс Віктару Цапоце, старшыні райвыканкама, сподак з зернем новага ўраджаю.
Л. ІЎЕЎ.
НА ЗДЫМКУ: (на першым плане) Сяргей Кухто перадае зерне новага ўраджаю — плён працы многіх — Віктару Цапоце.