Бывай, школа! На Сенненшчыне празвінелі апошнія званкі
Учора для 246 адзінаццацікласнікаў сярэдніх навучальных устаноў раёна прагучаў апошні школьны званок. Юнакі і дзяўчаты развіталіся з дзяцінствам і адчынілі дзверы ў дарослае жыццё. Наперадзе іх чакаюць выпускныя і ўступныя экзамены.
Мерапрыемствы ў школах раёна распачаліся ў 9.00. А ў поўдзень выпускнікі-2011 «зляцеліся» ў Сянно. Святочная лінейка адбылася на цэнтральнай плошчы горада. Кіраўніцтва раёна, настаўнікі, бацькі павіншавалі дзяцей са знакавай у іх жыцці падзеяй і пажадалі ўсяго самага добрага, а галоўнае — правільнага выбару жыццёвага шляху.
За актыўную творчую дзейнасць і поспехі ў вучобе лепшыя вучні Сенненшчыны атрымалі дыпломы. Прыемна парадавала і тое, што ў гэтым годзе 10 выпускнікоў прэтэндуюць на медалі. Гэта немалая лічба. Летась, напрыклад, выдатнікаў было амаль што напалову меней.
Пазней у раённым Доме культуры быў наладжаны традыцыйны фестываль «Вясна надзей». Цудоўным сюрпрызам стаў канцэрт, які падрыхтавалі студэнты ВДУ імя П.М. Машэрава.
Але на гэтым свята не скончылася. Дыскатэка з конкурсамі і падарункамі працягвалася да 19.00.
Атэстаты аб базавай адукацыі атрымаюць сёлета 316 чалавек.
Кацярына КАРПОВІЧ.
На здымках: апошні званок ў школе №1 г.Сянно.
