«На чаёк» у Сенненскі музей
Вечар 19 мая некаторыя сенненцы правялі ў музеі, куды іх запрасілі «прыйсці са сваімі кубкамі». Такім чынам было вырашана адзначыць Міжнародны дзень музеяў, які ў нашай краіне традыцыйна святкуецца і мае на мэце адраджэнне і папулярызацыю народных звычаяў, абрадаў, культурных традыцый беларусаў. Асаблівую ўвагу наведвальнікаў прыцягвае «вясельная» зала, у якой, дарэчы, святочная рэгістрацыя шлюбаў праводзіцца ўжо другі год.
Пра гэты абрад у «раёнцы» пісалі неаднойчы, але ж пабачыць яго сваімі вачыма маглі толькі госці вяселля. У гэты жа дзень стаць удзельнікамі тэатралізаванага абраду запрасілі ўсіх жадаючых, хто завітаў на свята. Супрацоўнікі музея, раённага і Багушэўскага Дамоў культуры паказалі абрады заручын і вяселля. Сцэнарый быў складзены згодна з сенненскімі традыцыямі. Браніслава Жаўтабрухава, галоўны захавальнік, працавала над яго распрацоўкай не адзін дзень, бо ёй хацелася зрабіць сенненскае вяселле не толькі запамінальным, але і цікавым. Так яно і атрымалася: гучалі песні, прымаўкі, жарты. Маладых абсыпалі зернем, саджалі на дзяжу нявесту, запляталі ёй касу, жартавалі над сватам, госцейкамі. Прыемна парадавалі музычнымі нумарамі супрацоўнікі ДМШ, удзельнікі ансамбля «Вясёлыя музыкі» і фальклорнага гурта «Медуніца» з Багушэўска, а таксама моладзь з сельскага клуба аграгарадка Белая Ліпа.
А якое ж вяселле без застолля, галоўным атрыбутам якога быў самавар. Яго ставілі на стол як у шляхецкіх, так і сялянскіх хатах. Пабачыць гэты самабытны прадмет ужытку ўсе жадаючыя змаглі ў адной з выставачных залаў, у якой размясціліся 14 самавараў.
Ужо пазней усе госці частаваліся смачнай гарбатай з абаранкамі і пернікамі. Дзверы музея былі адчынены да 23.00.
Кацярына КАРПОВІЧ.