Найбольш сенненцаў звяртаюцца ў “Белтэлекам” за інтэрнетам і інтэрактыўным тэлебачаннем.
Кожны чалавек, які сёння раніцай уключыць тэлевізар ці паслухае радыё, загляне ў паштовую скрынку, узніме тэлефонную трубку, выйдзе ў інтэрнэт, сімвалічна адзначыць Дзень сувязі — прафесійнае свята людзей, якія забяспечваюць нам магчымасць зносіцца, працаваць, адпачываць, знаходзіць патрэбную інфармацыю.
Работнікі Сенненскага раённага вузла электрычнай сувязі Віцебскага філіяла РУП «Белтэлекам» сваё прафесійнае свята сустракаюць у працы. У галіне адбываюцца маштабныя тэхналагічныя змены, якія дапамагаюць рабіць сувязь больш даступнай і надзейнай. Пра гэта і не толькі мы гутарым з Сяргеем Касьянавым, начальнікам Сенненскага РВЭС.
— Сяргей Леанідавіч, якія ноу-хау «Белтэлекама» найбольш запатрабаваныя жыхарамі раёна?
— Найбольшую колькасць заявак мы атрымліваем на падключэнне да высокахуткаснага інтэрнэту і да інтэрактыўнага тэлебачання «ZALA». Гэтымі нашымі паслугамі ўжо могуць карыстацца не толькі жыхары Сянно і Багушэўска. Неабходнае тэхналагічнае абсталяванне ўстаноўлена на АТС вёсак Полымя, Рулёўшчына, Белая Ліпа, Студзёнка, Ульянавічы, Сінягорскае, Нямойта, Янова, Цыпкі, што дазваляе карыстацца хуткасным інтэрнэтам і інтэрактыўным тэлебачаннем не толькі жыхарам названых вёсак, але і бліжэйшых населеных пунктаў. Не буду хаваць, большую частку даходаў, якія раённы вузел электрычнай сувязі атрымаў у 2010 годзе, прынесла насельніцтва.
— Новыя паслугі — гэта добра. Але кліенты раённага вузла сувязі шмат наракаюць, у тым ліку праз сродкі масавай інфармацыі, на якасць работы праваднога радыёвяшчання…
— Такая праблема сапраўды існуе. Аднак карыстальнікам названай паслугі трэба разумець, што правадное радыё — гэта ўчарашні дзень. У бліжэйшыя гады нават раённае радыё пяройдзе на FM-вяшчанне.
— Якія навіны ад «Белтэлекама» яшчэ чакаюць сенненцаў?
— У 2011 годзе ўстаноўлены вынасныя тэлекамунікацыйныя шафы ў райцэнтры, плануецца пракладка оптыка-валаконных ліній сувязі да Багданава,Ходцаў, Обалі, Канстантова. Нягледзячы на сур’ёзную канкурэнцыю, якую для «Белтэлекама» ствараюць аператары мабільнай сувязі, пастаянным попытам карыстаецца стацыянарная сувязь, таму у планах павелічэнне нумарной магутнасці станцый у Сянно і Багушэўску.
— Новыя тэхналогіі, новыя віды паслуг патрабуюць ад спецыялістаў адпаведнай падрыхтоўкі, маладых кадраў…
— Сувязь сапраўды развіваецца вельмі актыўна. Сёння, напрыклад, у нас у калектыве працуе 69 чалавек (у 1996 было 112), у тым ліку моладзі да 31 года — 16 чалавек. 10 з іх маюць сярэднюю спецыяльную адукацыю, 2 завочна вучацца ў вышэйшых навучальных установах. Вучацца ў вну і людзі старэйшага ўзросту. Да таго ж працуе бесперапынная сістэма перападрыхтоўкі, атэстацыі спецыялістаў.
Тэхналагічныя змены ў галіне вымусілі нас памяняць і структуру раённага вузла электрасувязі. Сёння яна складаецца з трох лінейна-тэхнічных участкаў, якія абслугоўваюць Сянно, Багушэўск і сельскую мясцовасць, групы прадаж паслуг, станцыйнай групы і групы механізацыі.
— Ці ёсць у калектыве людзі сталага ўзросту?
— Ёсць і ветэраны, людзі, якія ўсё жыццё адпрацавалі ў сферы электрасувязі. Да іх у калектыве асаблівае стаўленне. Іх вопыт запатрабаваны. Мы помнім таксама пра тых, хто пайшоў з нашага калектыву на пенсію. Карыстаючыся выпадкам, хачу павіншаваць усіх калег, ветэранаў працы са святам. Пажадаць ім вялікага чалавечага шчасця, здароўя!