Дапамог затрымаць злачынцу
У выбары будучай прафесіі выпускнік Ульянавіцкай сярэдняй школы Яўген Лісецкі вызначыўся даўно — ён будзе міліцыянерам. Больш таго, зроблены першыя крокі ў гэтым накірунку.
Хлопец прайшоў медыцынскую камісію, рыхтуецца да ўступных іспытаў у Акадэмію МУС. Нават паспеў засведчыць наяўнасць неабходных прафесійных якасцей, што дапамагло супрацоўнікам Сенненскага РАУС затрымаць злачынцу. Ніну Зайцаву, якая здзейсніла шэраг крадзяжоў, шукалі не толькі сенненскія, але і аршанскія міліцыянеры.
Бываючы ў аддзеле ўнутраных спраў Сенненскага райвыканкама Жэня ўважліва вывучаў фотаздымкі на стэндзе “Іх шукае міліцыя”. Таму адразу запрыкмеціў жанчыну, якая ехала на рэйсавым аўтобусе Сянно — Нярэйша і выйшла на чыгуначнай станцыі Бурбін. Там жа сышоў і Жэня. Сумненняў не было — яна, злачынца. З мабільніка хлопец набраў нумар “дзяжуркі”. І праз кароткі час міліцыянеры былі на станцыі.
На гэтых днях у школе, дзе Яўген Лісецкі працягвае вучыцца, пабываў намеснік начальніка Сенненскага РАУС па ідэалагічнаму і кадраваму забеспячэнні, капітан міліцыі Сяргей Савік. Ад імя кіраўніцтва аддзела ён уручыў будучаму калегу Падзяку і памятны каштоўны падарунак, якім стаў футбольны мяч. Цырымонія праходзіла ў школьным музеі ў прысутнасці вучняў і настаўнікаў навучальнай установы.
Аляксандр ЛАЗЮК.