Каля ёлки нашай навагодняй!
Галоўная ёлка раёна парадавала сёлета 197 дзяцей з мнагадзетных і малазабяспечаных сямей, актывістаў піянерскага руху і ўдзельнікаў школьных і раённых мерапрыемстваў. Падрыхтавалі дабрачынны ранішнік аддзелы культуры і адукацыі. Значны ўклад у правядзенне свята ўнеслі супрацоўнікі цэнтра пазашкольнай работы.
Яшчэ да пачатку дзейства ў фае Ходцаўскага Дома культуры адчувалася прыўзнятая атмасфера чакання цудаў і падарункаў. Дзяцей і іх настаўнікаў сустракалі вясёлы Клоун і дабрадушны Мядзведзь. Асабліва прыцягвалі гэтыя персанажы самых маленькіх гасцей мерапрыемства.
У глядзельнай зале перад навагоднім прадстаўленнем жвавыя клоуны Сцёпа і Клёпа наладзілі вясёлую пераклічку, імправізаваную казку «Чырвоная шапачка», іншыя гульні і забавы.
Адкрыла свята дырэктар Сенненскага цэнтра пазашкольнай работы Валянціна Віктараўна Каржыцкая, якая адзначыла, што раённая дабрачынная ёлка праводзіцца ў рамках рэспубліканскай акцыі «Нашы дзеці», якая прызвана падтрымліваць юных грамадзян нашай краіны.
Намеснік старшыні райвыканкама Зоя Сцяпанаўна Фаміна павіншавала дзяцей з самым лепшым святам, пажадала, каб новы год прынёс толькі дабрабыт, шчасце і мір. Выказала спадзяванне, што дзеці Сенненшчыны будуць праслаўляць свой родны край добрымі справамі, як гэта робяць Міхаіл Ганчароў, Анастасія Грытчанка, Арцём Карніцкі і іншыя вучні, якіх ведаюць у вобласці і рэспубліцы за высокія творчыя дасягненні.
…Традыцыйныя спадарожнікі навагодніх святаў Дзед Мароз і Снягурка, іх верныя памочнікі Скамарохі, сімвал 2011 года Белы Трус, Баба Яга і Лясун, Ліса Аліса і Кот Базіліа разыгралі для дзяцей цудоўную казку. «Нячыстая сіла» выкрала Снягурку. Але ўсё ж дабро ўзяло верх, і свята працягвалася вакол ёлкі-прыгажуні.
Практычна кожны з дзяцей прыняў удзел у гульневай праграме: паказаў сваю эрудыцыю, кемлівасць і знаходлівасць. Ніхто не застаўся без салодкіх ласункаў,ні ўдзельнікі гульняў, ні ўладальнікі прыгожых карнавальных касцюмаў.
Акрамя таго, усе запрошаныя на свята дзеці, як і заўсёды, атрымалі навагоднія падарункі са смачнымі цукеркамі і шакаладкамі. Грошы на гэтыя падарункі былі выдаткаваны з рэзервовага фонду раённага выканаўчага камітэта.
А яшчэ на Новы год падарункі, набытыя за кошт сродкаў, заробленых на суботніках жыхарамі раёна, атрымалі Сенненская школа-інтэрнат (мікрахвалевую печ, два наборы сталовага посуду і пыласос), Багушэўскі дом-інтэрнат (два тэлевізары і DVD-плэер) і дзіцячы сацыяльны прытулак (аўтаматычную пральную машыну і цукеркі).
Таццяна Буракова.
На здымках: у час свята.