У Сенненскім райвыканкаме падрыхтавалі інвестыцыйны атлас раёна

Дакумент, хочацца спадзявацца, павысіць цікавасць да рэгіёна людзей, якія маюць фінансавыя сродкі, каб укласці іх дзеля атрымання дывідэндаў.

     — Сенненшчына традыцыйна ўспрымаецца як аграрны раён, бо яе эканоміка грунтуецца на вытворчасці сельскагаспадарчай прадукцыі. У той жа час 70% раёна пакрыта лесам, у нас маюцца значныя запасы жвіру, гліны, шмат азёр, багатых на сапрапель. З улікам геаграфічнага размяшчэння ўсё гэта, а таксама наяўнасць разгалінаванай сеткі аўтамабільных дарог, чыгункі, блізасць да Оршы і Віцебска, буйных прамысловых цэнтраў павышае інвестыцыйную прыцягальнасць рэгіёна, — лічыць Інэса Гардзецкая, начальнік аддзела эканомікі райвыканкама. – Важна паказаць, давесці да патэнцыяльных інвестараў яго перавагі.

 У атласе змешчаны перспектыўныя інвестыцыйныя прапановы, якія маюць на ўвазе вытворчую дзейнасць на аснове розных форм уласнасці, у тым ліку з выкарыстаннем мясцовай сыравіны, да прыкладу, сапрапелю, вытворчых адходаў – перагнанай брагі Багушэўскага спіртзавода для атрымання кармавых дражджэй, прыродных і створаных чалавекам рэсурсаў. У атлас уключана больш за 20 канкрэтных інвестыцыйных праектаў.

 Тут жа змешчаны пералік маёмасці, якая зараз не выкарыстоўваецца. Раён гатовы бязвыплатна перадаць яе інвестарам пад канкрэтную праграму арганізацыі вытворчасці. Большасць пабудоў выдатна захаваліся, калі патрабуюць якіх работ, то толькі тых, што звязаны з рэканструкыяй пад канкрэтны праект.

 Раённыя ўлады гатовы прадаставіць для інвестараў пад прапанаваныя ці іх асабістыя праекты зямельныя ўчасткі, азёры, дзе могуць з’явіцца аб’екты гандлю, сферы абслугоўвання, аграэкатурызма.

 — На Сенненшчыне за апошнія гады рэалізаваны не адзін паспяховы інвестыцыйны праект, у тым ліку па вытворчасці экспартна арыентаванай прадукцыі. Многія развіваюцца, павялічваюць аб’ём вытворчасці, лінейку вырабаў, — падкрэслівае Інэса Гардзецкая, — што сведчыць аб перспектыўнасці рэгіёна і нашай зацікаўленасці ў развіцці партнёрскіх кантактаў з бізнэсам.

  У атласе можна знайсці пералік нарматыўна прававых дакументаў, электронныя адрасы для наладжвання кантактаў, што дапаможа хутчэйшай рэгістрацыі суб’ектаў гаспадарання малога і сярэдняга прадпрымальніцтва.

 Інвестыцыйны атлас Сенненшчыны працягвае дапрацоўвацца і ўдасканальвацца на аснове аналізу і вывучэння створаных у Беларусі падобных дакументаў. Важна, каб ён быў максімальна напоўнены інфармацыяй, зручнай у карыстанні, і прывёў да пашырэння патоку інвестыцый у раён, што паспрыяе паляпшэнню сацыяльна-эканамічнай сітуацыі ў рэгіёне, прынясе карысць кожнаму жыхару раёна. Не менш важна зрабіць інфармацыю даступнай, як мага для большай колькасці патэнцыяльных яе спажыўцоў. І тут варта выкарыстаць усе магчымасці: шырокую прэзентацыю, размяшчэнне ў інтэрнэце на розных пляцоўках.

Аляксандр Яўгенаў.

 

У Сенненскім райвыканкаме падрыхтавалі інвестыцыйны атлас раёна: 1 комментарий

  • Суббота, 27 янв., 2018 в 11:58
    Permalink

    Когда и в каких источниках появится конкретная информация?

    Рейтинг комментария:Vote +1+1Vote -1-1

    Ответ

Добавить комментарий

Ваш e-mail не будет опубликован. Обязательные поля помечены *