Уражанні самыя прыемныя
Міжнародны назіральнік на выбарах Прэзідэнта Рэспублікі Беларусь Яўген Дзіброў на Сенненшчыне прадстаўляў Саюз Незалежных Дзяржаў. У Сянно ён прыехаў вечарам 16 снежня. А ўжо назаўтра наведаўся на некалькі выбарчых участкаў, дзе працягвалася датэрміновае галасаванне. У нядзелю, у дзень выбараў, ён таксама займаўся назіраннем. У другой палове дня Яўген Дзіброў пагадзіўся сустрэцца з супрацоўнікам райгазеты «Голас Сенненшчыны» Аляксандрам Лазюком.
— Яўген Паўлавіч, на радзіме чым вы займаецеся ў паўсядзённым жыцці?
— Я — старшыня Тэрытарыяльнай выбарчай камісіі Пскоўскага раёна.
— Можна сказаць, што выбарамі органаў улады вы займаецеся прафесійна?
— Можна…
— А што робіце ў прамежак часу паміж выбарамі?
— Таксама выбарамі. У Расіі крыху іншая выбарчая сістэма. За тры гады, якія я займаю пасаду старшыні выбарчай камісіі Пскоўскага раёна, выбары на яго тэрыторыі ў мясцовыя, абласныя, федэральныя органы ўлады праводзіліся шэсць разоў. Да таго ж адбывалася некалькі аб’яднанняў тэрыторый, што мае на ўвазе правядзенне рэферэндумаў. — У такім выпадку я папрасіў бы вас сказаць колькі слоў пра арганізацыю выбараў на Сенненшчыне?
— Мне давялося працаваць з прадстаўнікамі мясцовых органаў улады, членамі раённай і ўчастковых камісій, бываць на выбарчых участках. Зыходзячы з убачанага, з атрыманай інфармацыі, з маіх ведаў беларускага выбарчага заканадаўства і Канстытуцыі Рэспублікі Беларусь, парушэнняў я не ўбачыў.
— Яўген Паўлавіч, вам у Беларусі даводзілася бываць раней?
—Я наведваўся ў Віцебск, быў у Гомелі. Але ў сельскім раёне — першы раз.
— Тады падзяліцеся сваімі ўражаннямі ад убачанага.
— Уражанні самыя прыемныя. Вашы школы, клубы — дагледжаныя. У іх створаны належныя ўмовы для вучобы, адпачынку. На вашых фермах утрымліваецца шмат жывёлы. Вашы палі ўзараны і засеяны. У магазінах шмат разнастайных тавараў, а беларусы — адкрытыя і шчырыя людзі.
— Дзякуй за размову. Прыязджайце да нас яшчэ.
— А вы да нас. Дарэчы, на Пскоўшчыне шмат беларусаў. Некаторыя з іх, ведаю, прымаюць удзел у міжнародным назіранні на выбарах Прэзідэнта Рэспублікі Беларусь.