Сенненец увайшоў у дзясятку лепшых участковых ІСН краіны

У Гродне падвялі вынікі ХIII рэспубліканскага агляду-конкурсу прафесійнага майстэрства на званне «Найлепшы ўчастковы інспектар міліцыі» і «Найлепшы ўчастковы інспектар па справах непаўналетніх». Гонар зборнай участковых ІСН Віцебшчыны на спаборніцтвах годна адстойваў прадстаўнік Сенненскага раёна Дзмітрый Васільеў.

Служба ўчастковых інспектараў заўсёды была і застаецца адной з самых запатрабаваных насельніцтвам. Таму і патрабаванні да супрацоўнікаў такія высокія. Добрасумленнасць у выкананні службовых абавязкаў, гатоўнасць заўсёды прыйсці на дапамогу, абараняць грамадзян ад злачынных замахаў — тыя якасці, якія з’яўляюцца падмуркам дзейнасці ўчастковага інспектара. Менавіта яны ў спалучэнні з культурай паводзін, высокім прафесіяналізмам складаюць негалосны кодэкс гонару, закліканага фарміраваць станоўчы імідж усёй сістэмы органаў унутраных спраў, давер да супрацоўніка міліцыі.

На працягу двух дзён лепшыя прадстаўнікі прафесіі, вызначаныя па выніках раённых і абласных адборачных тураў, спаборнічалі ў страявой, агнявой, медыцынскай і спецыяльнай падрыхтоўцы, крыміналістыцы. Выконвалі нарматывы па фізічнай падрыхтоўцы.

Дарэчы, на абласным этапе агляду-конкурсу канкурсант ад Сенненскага раёна ў сваёй намінацыі заняў другое месца. Прафесійнае майстэрства Дзмітрый Міхайлавіч пацвердзіў і на рэспубліканскім узроўні, стаўшы сёмым i ўвайшоўшы ў дзясятку лепшых інспектараў ІСН Беларусі.

Дзмітрый Васільеў працуе старшым інспектарам па справах непаўналетніх Сенненскага РАУС, у зону яго абслугоўвання ўваходзяць гарпасёлак Багушэўск, Багушэўскі, Машканскі, Какоўчынскі сельсаветы.
Вольга БАНДАРЭВІЧ.

На здымку: Д.Васільеў (трэці злева) у складзе каманды Віцебскай вобласці.

 

Добавить комментарий

Ваш e-mail не будет опубликован. Обязательные поля помечены *