К пациентам с ветерком. Сельские ФАПы в Сенненском районе оснастили электровелосипедами
— Клас! — менавіта такім словам фельчары перадавалі свае ўражанні ад паездкі на электравеласіпедах. Незвычайныя транспартныя сродкі нядаўна паступілі на службу ў сельскія ФАПы і сталі своеасаблівым падарункам да прафесійнага свята — Дня медработніка — для тых, хто стаіць на варце здароўя вяскоўцаў.
Набыццё электравеласіпедаў стала магчымым дзякуючы перамозе сумеснай ініцыятывы раённай арганізацыі ГА «Беларускі саюз жанчын» і цэнтральнай раённай бальніцы “Не губляючы часу” ў конкурсе мясцовых ініцыятыў, які праводзіўся ў рамках праекта ЕС-ААН “Прафілактыка неінфекцыйных захворванняў, прасоўванне здаровага ладу жыцця і падтрымка мадэрнізацыі сістэмы аховы здароўя ў Рэспубліцы Беларусь”, што фінансуецца Еўрапейскім саюзам і рэалізуецца ПРААН, СААЗ, ЮНІСЕФ і ЮНФПА ў супрацоўніцтве з Міністэрствам аховы здароўя Рэспублікі Беларусь.
Асноўную частку населеных пунктаў раёна складаюць пасёлкі ды вёскі. Многія з іх аддалены ад лячэбных устаноў. Між тым, у выпадках, калі дарагая кожная хвіліна, своечасова аказаная медыцынская дапамога можа выратаваць здароўе і жыццё пацыента. Так з’явілася ідэя абсталяваць сельскія ФАПы электратранспартам, каб медыкі змаглі хутчэй дабрацца да сваіх пацыентаў, сярод якіх нямала сталых людзей, а ім, як правіла, часцей за ўсё патрабуецца медабслугоўванне.
На набыццё элекравеласіпедаў была выдзелена звыш 9 000 еўра. На сённяшні дзень роварамі ўкамплектаваны ўсе 18 ФАПаў. На днях сельскіх фельчараў запрасілі ў райбальніцу, каб уручыць ім сертыфікаты і ключы ад новенькіх ровараў. Большасць тых, хто сядзе за руль двухколавага транспарту, — жанчыны. Гэтым, падкрэсліла намеснік старшыні райвыканкама і кіраўнік раённай арганізацыі ГА “БСЖ” Зоя Фаміна, і абумоўлена рашэнне падтрымаць ініцыятыву з боку грамадскага аб’яднання. Электравеласіпеды істотна аблегчаць і паскораць працу сельскіх медыкаў, палепшаць якасць медабслугоўвання.
Каардынатар ініцыятывы, юрысконсульт Сенненскай ЦРБ Вікторыя Савельева правяла для фельчараў трэнінг па эксплуатацыі велатранспарту, у прыватнасці, пазнаёміла з правіламі дарожнага руху (дарэчы, для электравеласіпедыстаў пасведчанне на права кіравання не патрэбна), тэхнікай бяспекі, умовамі захоўвання і іншымі аспектамі. Кожны работнік атрымаў падрабязную памятку па эксплуатацыі.
Хутчэй за ўсіх са сваімі «жалезнымі» памочнікамі асвоілася моладзь. Не адставалі ад маладых калег і вопытныя медработнікі. Надзея Конанава з Обальскага ФАПа ў медыцыне больш за 40 гадоў, але і на пенсіі яна працягвае працаваць. Зона яе абслугоўвання — адна з самых вялікіх: больш за 400 жыхароў, 7 населеных пунктаў, радыус абслугоўвання складае 8 кіламетраў. Дабірацца да пацыентаў, па яе словах, прыходзілася то на звычайным ровары, то аўтастопам, калі муж падвозіў, а часам і пешшу. З навінкай велапрома Надзеі Аляксандраўне дапамагаў разбірацца ўнук Арцём. Выпускнік гэтага года, юнак мусіць паступаць у БНТУ, так што з тэхнікай ён на «ты». Пад кіраўніцтвам унука Надзея Конанава хутка навучылася кіраваць электравеласіпедам.
— Як на скутары, — дзеліцца ўражаннямі Ірына Любачка, фельчар Багданаўскага ФАПа.
На мотатранспарце, прызнаецца жанчына, ездзіць хоць і ўмее, але не можа з-за адсутнасці правоў на яго кіраванне. Таму электравеласіпед стане для яе добрай альтэрнатывай.
У той жа дзень многія адправіліся на новых роварах на працоўныя месцы.
Вольга БАНДАРЭВІЧ.
Фота аўтара.
