Профилактику деменции проводят в отделении дневного посещения для престарелых граждан ТЦСОН Сенненского района
Аддзяленне дзённага наведвання для састарэлых грамадзян ТЦСАН Сенненскага раёна, што знаходзіцца ў г.п.Багушэўск, прымае актыўны ўдзел у абласным пілотным праекце «Сістэма работы па прафілактыцы дэменцыі ў аддзяленнях для грамадзян састарэлага ўзросту з прыцягненнем валанцёраў», які рэалізуе камітэт па працы, занятасці і сацыяльнай абароне Віцебскага аблвыканкама сумесна з Беларускім рэспубліканскім геранталагічным грамадскім аб’яднаннем і Аўтаномнай некамерцыйнай арганізацыяй «Навукова-доследны медыцынскі цэнтр «Геранталогія».
У аддзяленні рэалізуюцца праекты «Субяседнік на гадзіну», «Пасядзелкі» і іншыя, выезды з канцэртнымі праграмамі ў аддаленыя населеныя пункты раёна. Усё гэта служыць пашырэнню зносін паміж старымі людзмі, а значыць, прафілактыцы дэменцыі.
Вопыт багушэўскага аддзялення дзённага знаходжання для састарэлых грамадзян быў высока ацэнены на Міжнароднай навукова-практычнай канферэнцыі «Дэменцыя і старэнне: сацыяльная служба прымае выклік часу».
Дарэчы, у аддзяленні асвоілі яшчэ адну форму работы, якая таксама будзе садзейнічаць павышэнню якасці прафілактыкі дэградацыі разумовай функцыі ў старых, — абмен вопытам з іншымі фарміраваннямі людзей паважанага ўзросту. У пачатку лютага багушэўцы, пасля таго, як самі пабывалі ў гасцях, прымалі з візітам у адказ ініцыятыўную групу Таварыства Чырвонага Крыжа «Родник» з Сянно. Клуб аддзялення “Спявай, душа!” падрыхтаваў для сенненцаў канцэртную праграму, а майстрыхі клуба “Гаспадынька” падрыхтавалі выпечку для салодкага стала.
У час такіх сустрэч пажылыя людзі маюць магчымасць абмена інфармацыяй, атрымання станоўчых эмоцый і ўражанняў. Не здарма ж кажуць: “Зносіны – лепшае лякарства ад старэння”, — пракаментавала падзею супрацоўніца аддзялення Любоў Трубека.
Таццяна БУРАКОВА.