Чарговае пасяджэнне раённага штаба па пытаннях прафілактыкі афрыканскай чумы свіней (АЧС) прайшло ў Сянне

61ae8d54-459d-44ac-8307-afdcf47a4a7f_1     Як паведаміла галоўны ветэрынарны ўрач раёна Алена Мялешка, на тэрыторыі Сенненскага раёна ветэрынарнай службай, упраўленнем сельскай гаспадаркі і харчавання райвыканкама, работнікамі ДЛГУ “Багушэўскі лясгас” і Беларускім таварыствам паляўнічых і рыбаловаў праводзіцца шэраг мерапрыемстваў па прафілактыцы афрыканскай чумы свіней. У прыватнасці, адстрэл дзікоў, якія застаюцца асноўнымі разносчыкамі хваробы. Аднак, работа гэта арганізавана не на належным узроўні. Так, на паляўнічых угоддзях СФГ “Барысёнак” адстрэлена толькі 5 з 10 выяўленых жывёлін.

На свінакомплексе СУП “Саўгас імя Машэрава” ўстаноўлены санпрапускнікі, відэаназіранне. Комплекс агароджаны. Робіцца ўсё неабходнае, каб звесці да мінімуму рызыку пранікнення інфекцыі. Што датычыцца персаналу ферм, то ім катэгарычна забаронена утрымліваць свіней у хатняй гаспадарцы. Ветэрынарам, якія абслугоўваюць такія фермы, забаронена аказваць прафесійныя паслугі насельніцтву.

Адказнымі асобамі два разы на год праводзяцца праверкі прыватных падворкаў жыхароў населеных пунктаў Машканы, Масоры, Ярошкі, Обаль, Задарожжа, размешчаных у пяцікіламетровай зоне ад свінагадоўчага комплексу. Пакуль парушэнняў выяўлена не было.

  Большасць жыхароў раёна аб захворванні чулі нямала – у папярэднія гады многія з іх у сувязі з АЧС не мелі магчымасці ўтрымліваць гэтых жывёл у прыватных гаспадарках. Алена Мялешка яшчэ раз нагадала аб мерах перасцярогі для тых гаспадароў, якія трымаюць свіней: не пускаць старонніх у свае гаспадарчыя пабудовы, трымаць жывёлу толькі ў памяшканнях, пазбавіцца ад грызуноў, якія таксама могуць быць пераносчыкамі інфекцыі, ні ў якім разе не набываць камбікорм у заезджых гандляроў. Па ўсіх пытаннях лепш за ўсё раіцца са спецыялістамі.

Прафілактычныя меры абавязковыя для выканання і на аб’ектах грамадскага харчавання, гандлю, дзе паўсядзённай нормай павінна стаць выкарыстанне перад уваходам спецыяльных дэздыванкоў, выкананне санітарных правіл.

За парушэнне ветэрынарных правіл утрымання, забою, перамяшчэння жывёл пры ўзнікненні і распаўсюджванні заразных хвароб (у тым ліку АЧС) прадугледжана адміністрацыйная і крымінальная адказнасць.

Ларыса МУКАМОЛАВА.

Добавить комментарий

Ваш e-mail не будет опубликован. Обязательные поля помечены *