Няма прыбытковасці — няма прадпрыемства

     Пастановай Савета Міністраў №889 ад 31 кастрычніка зацверджаны пералік сельгаспрадпрыемстваў, што падлягаюць дасудоваму аздараўленню.

Сярод 323 суб’ектаў гаспадарання, да якіх бу­дзе прыменена гэта працэдура, пяць гаспадарак Сенненскага раёна: ААТ «Студзёнка», «Сінягорскае», «Бяленева», «Ульянавічы», СУП «Саўгас імя Машэрава».

Што чакае гэтыя сель­гасарганізацыі, расказала галоўны эканаміст ад­дзела эканомікі ўпраў­лення сельскай гаспадаркі і харчавання райвыканкама Юлія Рачкоўская.

—  Дасудовае аздараўленне — гэта комплекс мер, якія прымаюцца кіраўніком сельгаспрадпрыемства па забеспячэнні стабільнай і эфектыўнай гаспадарчай (эканамічнай) дзейнасці, па ўзнаўленні плацежаздольнасці сельгаспрадпрыемства.

У пералік гаспадарак, што падлягаюць працэдуры аздараўлення, увайшлі толькі тыя, якія да 1 верасня прадставілі бізнэс-планы. У іх прапісваюцца не толькі меры па выхадзе з крызіснай сітуацыі, але і ўказваюцца асобы, якія будуць несці персанальную адказнасць за яго рэалізацыю. Бізнэс-планы распрацаваны на 2016-2021 гады. Іх мэта заключаецца ў тым, каб прадпрыемства да заканчэння планавага перыяду працавала з прыбыткам у асноўных вытворчых галінах — раслінаводстве і жывёлагадоўлі. Згодна з Указам № 235 Прэзідэнта Рэспублікі Беларусь «Аб мерах па фінансавым аздараўленні сельскагаспадарчых арганізацый», сярод мер дасудовага аздараўлення прадугледжана рас­тэрміноўка пагашэння абавязацельстваў праблемных сельгаспрадпрыемстваў (пені, штрафаў за парушэнні па плацяжах у Фонд сацыяльнай абароны насельніцтва — на 5 гадоў; запазычанасць па вяртанні бюджэтных пазык — на 3; па падатках і зборах — на 3), якая ўтварылася на 1 ліпеня 2016 года. Акрамя таго, сельгаспрадпрыемствы могуць звярнуцца і да сваіх крэдытораў з прось­бай аб прадастаўленні ім растэрміноўкі. Указам  Прэ­зідэнта № 268 створана спецыялізаваная арганізацыя па рабоце з даўгамі неплацежаздольных сельгасарганізацый — ААТ «Агенцтва па кіраванні актывамі», якому перадаецца частка запазычанасці банкаў па крэдытах гэтых прадпрыемстваў.  Агенцтва надзелена паўнамоцтвамі па прадастаўленні адтэрміноўкі на год і растэрміноўкі на сем гадоў пад 3% гадавых.

Працэдура дасудовага аздараўлення — гэта рэальны шанц для сельгаспрадпрыемстваў пазбегнуць банкруцтва і стаць плацежаздольнымі. Але для гэтага кіраўніку, спецыялістам, усім работнікам прадпрыемстваў трэба мабілізавацца, каб увасобіць бізнэс-планы ў жыццё — запланаваныя лічбы павін­ны ўвасобіцца ў рэальныя надоі, прывагі, кармы і збожжа. Намаганні кожнага павінны быць накіраваны на атрыманне прыбытку. Няма прыбытковасці — няма прадпрыемства — няма працоўнага месца.

Яшчэ па 102 сельгасарганізацыях прынята рашэнне аб правядзенні працэддуры банкруцтва, сярод іх два нашых — ААТ «Пурплева» і КУСГП імя Гараўца. Будзе гэта санацыя альбо ліквідацыя вырашыць эканамічны суд.

 Ларыса МУКАМОЛАВА.