Дрэвы спілавалі за ўласныя грошы
За ўласныя грошы нанялі “альпіністаў” з Віцебска і звялі ўсе аварыйныя дрэвы на вясковых могілках жыхары в.Міцюкова Какоўчынскага сельсавета.
Ініцыятарам гэтай справы стала Надзея Русачэнка (да замужжа Філіпава), якая шэсць гадоў назад вярнулася ў родную вёску з Оршы. Пасля таго, як моцны вецер паваліў на могілках дзве бярозы, Надзея Фёдараўна вырашыла арганізаваць збор грошай сярод аднавяскоўцаў, каб спілаваць астатнія. Як выказалася сама пенсіянерка, каб было ўсім спакойна, і жывым, і мёртвым.
У добраахвотных ахвяраваннях прынялі ўдзел не толькі міцюкоўцы, а і ўраджэнцы вёскі, якія цяпер жывуць у гарадах, але не забываюць магілы сваіх родных. Сярод першых, хто адгукнуўся на добрую справу, былі Сяргей Сіднёў, жыхар г. Орша, і местачковец Міхаіл Русачэнка.
Какоўчынскі сельвыканкам дапамог з уборкай могілак пасля заканчэння асноўных работ.
Ул. інф.