Дом рамёстваў прапануе ўсім сенненцам далучыцца да стварэння пяцімятровага ручніка-абярэга

   1Да абласных “Дажынак – 2016” у Сянне саткуць пяцімятровы рушнік-абярэг, далучыцца да стварэння якога  ўжо змогуць жыхары райцэнтра.

     Сенненскі раённы Дом рамёстваў распачаў акцыю “Сатчом рушнік разам!”. Усе, хто жадае, могуць прыйсці ва ўстанову культуры і дапамагчы выткаць палатно. Гатовы рушнік будзе прэзентаваны на абласным фестывалі-кірмашу працаўнікоў вёскі.

     Ідэя акцыі ўзнікла невыпадкова. Дырэктар культурнай установы Вольга Квашко распавядае:

     — Дом рамёстваў працяглы час займаецца адраджэннем традыцый мясцовага ткацтва. Мы ставім сабе за мэту не толькі захаваць народную культуру, але і садзейнічаць яе развіццю. Сенненшчына –адметны ў плане ткацтва рэгіён. Адно тое, што з нашым раёнам звязана імя самай знакамітай ткачыхі Беларусі – Матроны Маркевіч, аўтаркі ўзору, што лёг у аснову арнаменту на дзяржаўным сцягу, таму яркае сведчанне. Працягнуць традыцыі продкаў – наш абавязак!

     І далучыцца да гэтай высакароднай справы майстры прапануюць усім сенненцам. Такім чынам, ужо сёння вы можаце зайсці ў раённы Дом рамёстваў і ўнесці сваю лепту ў гэтае неблагое пачынанне. Не перажывайце, калі не ўмееце ткаць: тутэйшыя майстры абяцаюць навучыць кожнага.

Вольга БАНДАРЭВІЧ.

На здымку: Першыя сцяжкі ўжо пакладзены… Вольга Квашко і майстар Іна Стычынская ля кроснаў з будучым рушніком.

Добавить комментарий

Ваш e-mail не будет опубликован. Обязательные поля помечены *