Чалавек і яго справа
Лічыцца, што сярод вадзіцеляў—прафесіяналаў найбольшай павагай карыстаюцца «дальнабойшчыкі«, тыя, хто працуе на міжгародніх ці міжнародных рэйсах. Іх называюць шафёрскай элітай.
Але ў катэгорыі работнікаў «баранкі» ёсць і іншыя, справа якіх не менш важная і патрэбная людзям. Да такіх сціплых працаўнікоў адносіцца і Леанід Уладзіміравіч Аднарогі. Яго вадзіцельскі стаж больш за 30 гадоў, з той пары, калі скончыў аўташколу ДТСААФ па накіраванні ваенкамата. Пасля службы ў арміі хлопец з Багданава працаваў у Віцебскай эксперыментальнай гаспадарцы. Цяпер, ужо шэсць гадоў, працуе ў аўтабазе, што абслугоўвае райспажыўтаварыства.
Няхай не можа Леанід Уладзіміравіч пахваліцца незвычайнай рамантыкай далёкіх дарог, гарадоў і краін, але яго верны ЗІЛ спраўна дастаўляе ў гандлёвыя кропкі з Віцебска, Магілёва і Крычава патрэбныя жыхарам нашага раёна будаўнічыя матэрыялы — цэглу, блокі, шыфер. Безаварыйнай, надзейнай работай вадзіцеля задаволена кіраўніцтва. Дырэктар ПУП «Сенненская аўтабаза» падкрэсліў: пра Леаніда Уладзіміравіча Аднарогага можна сказаць толькі добрыя словы.
Расказваць сам пра сябе гэты сціплы чалавек не любіць. Але ўсё ж «прызнаўся», што ёсць у яго любімы занятак у вольны час: аматар пасядзець на беразе возера з вудай, палавіць карасікаў.
Таццяна Буракова.
На здымку: вадзіцель ПУП «Сенненская аўтабаза» Л.У. Аднарогі.