«Пастушки» и петушки
Прадстаўнікам старэйшага пакалення сенненцаў вёска Пастушкі вядома тым, што мясцовы саўгас імя Гараўца ў 70-я гады мінулага стагоддзя пабудаваў тут на ўласныя сродкі даволі буйны па тым часе, на 12,5 тысячы галоў свіней, жывёлагадоўчы комплекс. Першыя гады ён функцыяніраваў даволі эфектыўна. За вытворчыя дасягненні сельгаспрадпрыемства і яго кіраўнік атрымалі высокія дзяржаўныя ўзнагароды.
Праўда, у гісторыі жывёлагадоўчага комплексу быў і іншы перыяд, які характарызаваўся паступовым зніжэннем пагалоўя, што скончылася ліквідацыяй свінагадоўліяк галіны і прывяло да паступовага разбурэння вытворчых пабудоў. Новае жыццё ім падаравала сумеснае таварыства з абмежаванай адказнасцю «Вітконпрадукт», асноўным накірункам дзейнасці якога з’яўляецца вытворчасць і перапрацоўка мяса птушкі. Інвестыцыйныя ўкладанні летам 2010 года дазволілі пачаць рэканструкцыю памяшканняў былога свінакомплексу.
— Да канца года ў эксплуатацыю будзе ўведзена 4 з 8 памяшканняў. Аб’ём інвестыцыйных укладанняў складзе каля 2 млрд беларускіх рублёў, — расказала Алена Паразенкава, галоўны эканаміст сумеснага прадпрыемства.
Першае памяшканне сутачнымі птушанямі-бройлерамі было заселена 8 кастрычніка, другое — 11. Ужо сёлета з’явяцца насельнікі і ў астатніх рэканструяваных памяшканнях, каб праз 42 дні (такі тэхналагічны перыяд складае вырошчваннептушкі да таварнай вагі) мяса трапіла на прылаўкі магазінаў. Калі першая чарга цэха па вырошчванні птушанят-бройлераў «Пастушкі» пачне функцыяніраваць на поўную магутнасць, пагалоўе на ім у год складзе 950 тыс. птушак, што дасць магчымасць атрымліваць каля 2 тысяч тон птушынага мяса ў жывой вазе. Увядзенне ў эксплуатацыю другой чаргі цэха, будаўнічыя работы на якой пачнуцца ў пачатку наступнага года, дазволіць павялічыць вытворчасць мяса яшчэ, як мінімум, на 1600 тон. Даволі значны ўклад у вытворчасць. Асабліва калі ўлічыць, што ў 2009 годзе на Сенненшчыне было вырашчана 3953 тоны свініны ў жывой вазе і 4040 тон мяса буйной рагатай жывёлы.
Асноўная частка прадукцыі СТАА «Вітконпрадукт» будзе рэалізоўвацца на ўнутраным рынку Беларусі, каля 30% паступіць на экспарт, пераважна ў Расію. Пашырэнне вытворчасці мяса прынясе бізнесмэнам новыя дывідэнды. Свае выгоды атрымаюць раён і сенненцы. Па-першае, гэта інвестыцыі ў мясцовую вытворчасць. Яны дазволілі ўключыць аб,ект у вытворчы працэс, які доўгі час не выкарыстоўваўся, стварыць новыя рабочыя месцы. Увядзенне ў эксплуатацыю першай чаргі цэха паспрыяла працаўладкаванню 12 чалавек. Немалаважна, што павялічыцца аб’ём вытворчасці сельскагаспадарчай прадукцыі. А значыць павялічацца падатковыя паступленні ў раённы бюджэт.
Аляксандр Лазюк.
На здымках: так выглядала тэрыторыя цэха па вырошчванні мяса птушанят-бройлераў «Пастушкі» СТАА «Вітконпрадукт» месяц таму.