У Сянне евангельскія хрысціяне-баптысты царквы «Надзея» запрасілі ўсіх жадаючых на святкаванне нараджэння Хрыста

 IMG_7607 Хрысціяне розных канфесій працягваюць святкаваць нараджэнне Хрыста. У Сянне евангельскія хрысціяне-баптысты царквы «Надзея» запрасілі раздзяліць гэтую радасць усіх жадаючых. А для дзяцей, якія ў пераважнай большасці прыйшлі з бацькамі, наладзілі батлеечны спектакль.

  У даступнай для аўдыторыі форме, пасрэдніцтвам лялек, якіх агучвалі сама­дзейныя артысты з аршанскай баптысцкай царквы, была расказана гісторыя пра таго, хто прыйшоў на зямлю, каб зрабіць людзей лепшымі, хто ахвяраваў сабой, сваім зямным жыццём дзеля іншых. Біблейскі сюжэт у пастаноўцы лялечнага тэатра цесна пераплецены з паўсядзённым жыццём хлопчыка Пеці і яго сяброў, якія ў рэшце рэшт пачынаюць разумець такія простыя і вечныя ісціны: не пажадай зла іншым; рабі так, як ты хочаш, каб ставіліся да цябе.

  Дзеці шчыра суперажывалі героям спектакля і на дзіва хутка засвоілі імёны біблейскіх герояў, зрабілі  правільныя вывады з павучальнай гісторыі. Гэта стала зразумелым, калі Ірына Дзя­мідчык і Аляксандр Пазняк, члены царквы «Надзея», паспрабавалі высветліць, ці былі засвоены ўрокі спектакля. Хаця, не, дзіўнага тут нічога няма. Многія прысутныя ў зале спектаклі, якія прымушаюць задумвацца над сэнсам жыцця, глядзяць не першы раз.

  Пасля спектакля дзеці атрымалі падарункі. Уручаць іх — яшчэ адна традыцыя сенненскіх хрысціян-баптыстаў. Як расказаў Павел Дзямідчык, прасвітар царквы «Надзея», «святочныя падарункі для дзяцей рыхтуюцца ў еўрапейскіх краінах, а вось даставіць іх дзецям — справа беларускіх цэркваў».

  Нас прыцягваюць самаахвярныя асобы. Іх на працягу гісторыі чалавецтва было шмат. Але Ісус Хрыстос здзейсніў найвялікшы подзвіг. «Ніхто не мае большай любові за тую, калі хто аддае жыццё за сваіх сяброў», — Хрыстос не толькі сказаў так, ён так зрабіў. Дзеля тых, хто яго любіў, прыняў, і ў імя ворагаў.

IMG_7597

IMG_7557IMG_7541IMG_7536

IMG_7526

 Аляксандр ЯЎГЕНАЎ.

Здымкі  аўтара.

Добавить комментарий

Ваш e-mail не будет опубликован. Обязательные поля помечены *