Як пенсіянерам не патрапіць на вуду махляроў?

  1449852514_old-ukrainian-country-sad-granny-portrait   Людзі сталага ўзросту вельмі даверлівыя, чым нярэдка карыстаюцца злачынцы. Асабліва часта на вуду махляроў трапляюцца пенсіянеры, якія жывуць у ад­даленых вёсках.

  — У нашым раёне за апошнія два гады злачынствы, здзейсненыя супраць людзей сталага ўзроста ці іх маёмасці, не фіксавалася, — расказаў Анатоль Ананенка, намеснік начальніка Сенненскага РАУС. Сустрэча з ім адбылася ў перыяд, калі ў раёне праводзілася спецыяльнае комплекснае мерапрыемства «Увага — узрост». — З 1 па 4 снежня ўчастковым інспектарам ставілася задача наведаць як мага больш састарэлых людзей, якія адзінока пражываюць у невялікіх аддаленых вёсках, каб папярэдзіць пра магчымую небяспеку.

  У 2013 годзе ў адну з вёсак Сенненскага раёна завітаў незнаёмец. Махляр па «сакрэту» паведаміў састарэлай жанчыне, што ў Расіі і ў Беларусі ўводзіцца адзіная грашовая адзінка — расійскі рубель. Пачаўся абмен беларускіх купюр, у чым ён прапанаваў свае паслугі. Купіўшыся на прапанову, вяскоўка страціла не адзін мільён рублёў, адкладзеных з пенсіі на чорны дзень.

  — У даным выпадку жанчына аказалася залішне даверлівай, — лічыць Анатоль Ананенка.  — Фактычна яна сама адчыніла махляру дзверы ў хату, сама аддала яму грошы. Пра небяспеку, якая можа зыходзіць ад незнаёмых людзей, сталым людзям трэба часцей  напамінаць не толькі міліцыянерам, але і іх дзецям.

 Праваахоўнікі рэкамендуюць не пускаць незнаёмцаў нават на парог, не праверыўшы дакументы. Зламыснікі нярэдка прапануюць купіць нейкі танны тавар, прыходзяць пад выглядам паштальёна ці сацыяльнага работніка, знаёмага суседзяў, нават, дзяцей. Перад новым годам могуць апранаць касцюмы Дзеда Мароза і Снягуркі.

Так здарылася летась. Да сенненкі-пенсіянеркі завітаў незнаёмы мужчына. Ён адрэкамендаваўся сацыяльным работнікам, які займаецца ўдакладненнем пенсійных дакументаў у сувязі з устанаўленнем надбаўкі пенсіянерам. Пакуль гаспадыня шукала пенсійную кніжку, іншыя запатрабаваныя дакументы, злодзей таксама не траціў часу. У выніку сталая жанчына праз некаторы час не знайшла даволі значнай сумы грошай.

 Як не стаць ахвярай махляра? Вось некаторыя рэкамендацыі ад Анатоля Ананенкі:

 — Сцеражыцеся незнаёмых людзей, якія настойліва спрабуюць патрапіць у вашу хату, кватэру пад выглядам работнікаў нейкіх дзяржаўных службаў — як мінімум папрасіце іх паказаць службовае пасведчанне.

 Не купляйце з рук электрабытавыя і іншыя тавары — яны могуць аказацца вельмі нізкай спажывецкай якасці.

 Не мяняйце незнаёмцам грашовыя купюры — невыключана, што яны фальшывыя.

 Ніколі не перадавайце свае грошы незнаёмым ці мала знаёмым людзям для аказання імі паслуг дзеля вырашэння вашых асабістых праблем з дапамогай пасадавых асоб — у абход закона гэта зрабіць немагчыма.

  Не пазычайце буйныя сумы грошай без належнага юрыдычнага афармлення і сведкаў — у выпадку непрадбачаных абставін даказаць факт здзелкі будзе праблематычна.

 Калі ж усё-такі вы сталі ахвярамі прайдзісвета, паспяшайцеся паведаміць пра гэта ў міліцыю. Чым хучэй вы звернецеся ў праваахоўныя органы, тым больш шансаў знайсці злачынцу.

 Аляксандр ЯЎГЕНАЎ.

Добавить комментарий

Ваш e-mail не будет опубликован. Обязательные поля помечены *