ПРАЦУЕ ДЛЯ НАШЧАДКАЎ

IMG_0051+++Адзін з накірункаў работы Сенненскага дома рамёстваў — адраджэнне традыцыйнай свістулькі, што атрымала назву глухараўскай па прозвішчы народнага майстра Генадзя Глухарава (1932-1990), які жыў на Сенненшчыне і займаўся вырабам глінянай цацкі-свістулькі. Майстар прадстаўляў свае вырабы на выставах і ў музеях, вучыў ляпіць дзяцей. Аднак, на жаль, сапраўднага пераемніка ў яго не засталося.

Сёння адраджэннем глухараўскай свістулькі займаецца майстар клуба народных майстроў «Натхненне», што працуе пры Доме рамёстваў, кіраўнік гуртка «Кераміка» Уладзімір Квашко. Перш чым пачаць гэту справу, Уладзімір Іванавіч наведаўся ў пасёлак Труд да нашчадкаў Генадзя Глухарава, сабраў матэрыял аб яго жыцці і дзейнасці. Сёння Квашко зрабіў ужо больш за 150 свістулек. У сваіх вырабах, асабліва сувенірных, майстар вялікую ўвагу надае брэндам горада і раёна.
У чэрвені бягучага года Сенненскі дом рамёстваў удзельнічаў у Міжнародным фестывалі песні і музыкі «Дняпроўскія галасы ў Дуброўне», у рамках якога працаваў горад майстроў, дзе быў арганізаваны конкурс традыцыйнай беларускай свістулькі «Салавейка-2015». Уладзімір Квашко прадставіў там вялікую калекцыю адроджанай глухараўскай свістулькі і ўласных работ.
Потым свае вырабы сенненскі майстар дэманстраваў на свяце майстроў народнай цацкі і свістулькі «Забава-2015», якое праходзіла ў рамках Славянскага базару.
Жыхары нашага горада маглі ўбачыць вырабы Квашко на выставе-кірмашы, арганізаванай у час святкавання Дня незалежнасці. Гліняныя свістулькі радавалі сваім мілагучным свістам дзяцей і дарослых і карысталіся попытам.
Уладзімір Квашко — асоба вельмі творчая. І як любы таленавіты чалавек мае рознабаковыя здольнасці. Зачароўваюць цудоўным роспісам яго плоскасныя пано, талеркі, куфры. Для іх афармлення майстар выкарыстоўвае алей, акрыл, гуаш, акварэль. Матывы роспісаў кветка-травяныя, арнаментальныя, гарадскія і вясковыя пейзажы. Са сваімі работамі Уладзімір Іванавіч прымаў удзел у Міжнародным свяце-конкурсе майстроў роспісу «Фарбы нябёс», якое праходзіла ў час ХХІІІ Міжнароднага фестывалю мастацтваў «Славянскі базар у Віцебску». Творы майстра вызначаюцца асаблівай любоўю да колернасці, адрозніваюцца ўласнымі прыёмамі роспісу, а кветкавыя матывы запаўняюць усю плошчу вырабу. Азы роспісу па дрэве настаўнік перадае сваім гурткоўцам.
Займаецца таленавіты майстар і жывапісам. Сярод іншых яго работ многіх асабліва ўражвае карціна «Макі», дзе кветкі выглядаюць так натуральна і прывабна, што хочацца сарваць іх прама з палатна.
Ва ўсіх творах мастака, жывапіс гэта, кераміка ці роспіс, удала спалучаюцца традыцыйнасць і ўласны аўтарскі стыль.
Творчасць Уладзіміра Квашко атрымала дастойнае прызнанне. Ён з’яўляецца лаўрэатам абласной выставы народнага дэкаратыўна-прыкладнога мастацтва «Жывая легенда», якая праходзіла ў час Усебеларускага фестывалю народнага мастацтва «Беларусь — мая песня», дыпламантам выставы «Я сын сваёй Радзімы, і слаўлю цябе, Беларусь» абласнога фестывалю нацыянальных культур «Нас з’яднала зямля Беларусі».
Сёння ў планах народнага майстра — адраджэнне традыцыйнага ўпрыгожвання вялікодных яек (пісанкі, маляванкі), бо арнамент распісных яек таксама захоўвае старажытную культуру беларусаў.
Таццяна Буракова.

На здымку: народны майстар Уладзімір Квашко са сваімі свістулькамі.
Фота аўтара.

Добавить комментарий

Ваш e-mail не будет опубликован. Обязательные поля помечены *