Акции, приуроченные к началу нового учебного года, на Сенненщине проводят сотрудники ОГАИ и РОЧС
З 25 жніўня па 5 верасня на тэрыторыі Сенненскага раёна праводзіцца комплекс спецыяльных мерапрыемстваў «Увага! Дзеці!», паведаміў старшы дзяржаўтаінспектар аддзялення ДАІ Сенненскага РАУС Аляксандр ЛАБАЦКІ.
Яны праходзяць у рамках рэспубліканскай акцыі па прафілактыцы і папярэджанні дзіцячага дарожна-транспартнага траўматызму і прымеркаваны да пачатку новага навучальнага года ва ўстановах адукацыі.
У гэты час вадзіцелі транспартных сродкаў павінны рухацца ў дзённы час сутак з уключаным бліжнім святлом фар. Парушальнікам, згодна з ч.3 арт.18.14 КаАП, пагражае адміністрацыйная адказнасць у выглядзе штрафу да 2 базавых велічынь (Br300 000).
Праблема дзіцячага дарожна-транспартнага траўматызму становіцца асабліва актуальнай з пачаткам навучальнага года. Пасля канікулаў дзеці адвыклі ад гарадской мітусні і выходзяць на вуліцы ў расслабленым стане. Таму вельмі важна перад школьнымі буднямі нагадаць і дзецям, і дарослым пра тое, што дарога да школы павінна быць бяспечнай, а гэтая бяспека залежыць у першую чаргу ад самадысцыпліны, ведаў і няўхільнага захавання правілаў дарожнага руху.
З пачатку года ў Віцебскай вобласці з удзелам дзяцей адбылося 19 дарожна-транспартных здарэнняў, у выніку якіх 22 дзіцяці атрымалі траўмы рознай ступені цяжкасці, а двое дзетак, на жаль, загінулі. Адзначыліся ў сумнай статыстыцы Шумілінскі, Докшыцкі, Лепельскі, Пастаўскі, Аршанскі раёны, гарады Орша і Полацк.
Сярод найбольш распаўсюджаных прычын ДТЗ — пераход дарогі ў неўстаноўленым месцы, раптоўны выхад на праезную частку перад блізка едучым транспартам, пераход дарогі на чырвоны сігнал святлафора. Так, 9 пацярпелых непаўналетніх своечасова не заўважылі транспарт, які набліжаўся, і памылкова лічылі, што знаходзяцца на бяспечнай ад яго адлегласці. Шасцёра раптоўна выбеглі на дарогу з-за аўтамабіляў і іншых аб’ектаў, з-за чаго вадзіцелі не змаглі своечасова адрэагаваць на перашкоду.
Як адзначае Аляксандр Лабацкі, дзеці не заўсёды правільна ацэньваюць тую ці іншую сітуацыю, таму вадзіцелі павінны быць выключна ўважлівымі і знізіць хуткасць пры з’яўленні дзіцяці на тратуары ці праезнай частцы.
Супрацоўнікі Дзяржаўтаінспекцыі таксама нагадваюць бацькам школьнікаў аб неабходнасці навучання апошніх правілам бяспечных паводзін на дарозе і, канешне, быць самім дысцыплінаванымі на вуліцы, бо, як вядома, дзеці бяруць прыклад з нас, дарослых.
Выхоўвайце ў вашых дзяцей пачуццё асцярожнасці пры пераходзе праезнай часткі, штодзённа напамінайце ім пра неабходнасць выканання правілаў пешаходнага руху, прышпіліце на верхняе адзенне дзіцяці святловяртальныя элементы.
«У цэнтры ўвагі — дзеці!”
Пад такой назвай з 20 жніўня па 30 верасня па ўсёй рэспубліцы праходзіць акцыя, прысвечаная Дню ведаў. Яе мэта — прыцягнуць увагу грамадскасці да праблем траўматызму і гібелі на пажарах з прычыны пакідання дзяцей без нагляду.
Акцыя праходзіць у тры этапы. Як расказалі ў раённым аддзеле па надзвычайных сітуацыях, у час першага этапу ў буйных гандлёвых аб’ектах раёна, дзе прапануюцца тавары для дзяцей, змешчана наглядная выяўленчая прадукцыя на супрацьпажарную тэматыку.
У час другога этапу на школьных лінейках і класных гадзінах супрацоўнікі РАНС правядуць з дзецьмі прафілактычныя гутаркі на тэму папярэджання надзвычайных сітуацый, асноўных прычын узнікнення пажараў, алгарытму дзеянняў у экстрэмальных сітуацыях. На заканчэнне мерапрыемстваў плануецца арганізаваць агульнашкольную вучэбную эвакуацыю.
У час трэцяга этапу выратавальнікі наведаюць дашкольныя ўстановы. Для дзяцей будзе арганізавана дэманстрацыя тэматычных павучальных мультфільмаў. З бацькамі правядуць прафілактычныя гутаркі, з педагагічным складам — інструктажы.