Замест Універсама — Супермаркет
Сенненцы могуць з гордасцю гаварыць: “У нашым горадзе адзін з самых сучасных магазінаў Віцебскай вобласці”. І будуць мець рацыю. Універсам “Родны кут” мае новае сучаснае гандлёвае абсталяванне і шырокі асартымент тавараў.
Пасля рамонту, які цягнуўся чатыры месяцы, універсам зноў прымае пакупнікоў. Сёння — гэта самая вялікая па плошчы гандлёвая кропка ў раёне.
— На рамонтныя работы, якія пачаліся ў маі гэтага года, было затрачана 625 мільёнаў рублёў. Больш за 450 млн пайшло на закупку новага гандлёвага абсталявання. Устаноўлена і сучасная сістэма відэаназірання як у гандлёвай зале, так і ў складскіх памяшканнях, — расказвае старшыня праўлення Сенненскага райспажыўтаварыства Аляксандр Шарэнда.
Цяпер у магазіне дзейнічае сістэма самаабслугоўвання. А значыць кожны тавар можна патрымаць уруках, даведацца пра яго састаў, тэрмін выпуску, якасць.
Прыемна ўражвае і асартымент. Тут прадстаўлена больш за 5 тысяч найменняў прадукцыі.
Акрамя гэтага, ва ўніверсаме можна аплаціць камунальныя ці іншыя паслугі. Тут усталяваны банкамат, працуе кіёск Беларусбанка. Ёсць і невялічкі кафетэрый, дзе за кубачкам гарбаты можна адпачыць.
Павіншаваць сенненцаў з гэтай значнай падзеяй прыйшлі намеснік старшыніаблвыканкама, дэпутат абласнога Савета дэпутатаў па Сенненскай выбарчай акрузе Алег Мацкевіч, старшыня праўлення Віцебскага абласнога спажывецкага таварыства Аляксандр Шынкарэнка і старшыня Сенненскага райвыканкама Эдуард Герасіменка.
Кацярына КАРПОВІЧ.