Нядаўна Сенненскае райспажыўтаварыства прымала гасцей. Тут сабраліся адказныя за ідэалагічную работу з усіх арганізацый раёна, каб паўдзельнічаць у семінары, арганізаваным аддзелам ідэалагічнай работы, культуры і па справах моладзі райвыканкама.
Удзельнікаў семінара сустракалі старшыня райспажыўтаварыства Аляксандр Пуцята і начальнік аддзела кадраў, кааператыўнай і ідэалагічнай работы Аляксандр Абушкевіч.
Распавядаючы пра арганізацыю, кіраўнік не ўтойваў — праблем хапае, у тым ліку ў рабоце з людзьмі. За прылаўкам магазінаў часта мяняюцца прадаўцы, даволі распаўсюджана растрата матэрыяльных каштоўнасцей. Адказны за ідэалагічную работу не мае права ігнараваць падобныя негатыўныя з’явы, лічыць Аляксандр Пуцята, павінен садзейнічаць ухіленню негатыўных праяў.
Сенненскае райспажыўтаварыства мае ўстойлівае фінансавае становішча, дынамічна развіваецца. Стан эканомікі дазваляе ўкладваць сродкі ў паляпшэнне ўмоў працы работнікаў, у рэканструкцыю вытворчасці. Аляксандр Пуцята з гонарам расказваў пра рэканструяваныя ў райцэнтры аб’екты грамадскага харчавання. «Сенненцы атрымалі выдатную магчымасць праводзіць тут сямейныя і карпаратыўныя святы. Сюды не сорамна запрасіць сталічных гасцей», — лічыць кіраўнік райспажыўтаварыства.
Укладзеныя сродкі вернуцца не хутка — такая спецыфіка грамадскага харчавання. Тым не менш райспажыўтаварыства ў бліжэйшы час займецца абнаўленнем кавярні ў Багушэўску.
Фінансавыя ўкладанні робяцца і ў работу з людзьмі. Такі вывад не цяжка было зрабіць у час экскурсіі, наладжанай па адміністрацыйным будынку райспажыўтаварыства Аляксандрам Абушкевічам. Інфармацыйныя стэнды абноўлены. Іх сэнсавая напоўненасць адпавядае палітычнаму моманту.
Размова пра прыярытэты ў рабоце ідэолагаў працягвалася ў актавай зале райспажыўтаварыства. Пасля выступлення Аляксандра Абушкевіча, які падзяліўся сваімі напрацоўкамі па стварэнні сістэмы інфармавання членаў калектыву даволі разгалінаванай арганізацыі, якой з’яўляецца райспажыўтаварыства, па матэрыяльным і маральным стымуляванні лепшых работнікаў. Вялікі інтарэс у калег выклікаў расказ пра дзейнасць грамадскіх арганізацый, вопыт па згуртаванні ідэалагічнага актыву.
У рабоце семінара прымалі ўдзел і госці. Аб дэмаграфічнай сітуацыі ў Сенненскім раёне расказалі Вольга Мялешка, начальнік аддзела ЗАГС, і Аляксандр Досаў, намеснік начальніка ўпраўлення па працы, занятасці і сацыяльнай абароне райвыканкама. Наталля Рыбчанка, намеснік старшыні камісіі па справах непаўналетніх, распавяла аб практыцы ўзаемадзеяння суб’ектаў прафілактыкі па арганізацыі летняга адпачынку і працаўладкаванні непаўналетніх. Гэтыя пытанні не могуць заставацца па-за сферай інтарэсаў адказных за ідэалагічную работу. Абмяркоўваліся і іншыя праблемы. У прыватнасці, Сняжана Мяцеліца, галоўны ўрач Сенненскага РЦГЭ, нават прывяла з удзельнікамі вучобы тэсціраванне, наколькі яны псіхалагічна гатовы жыць і працаваць разам з носьбітамі ВІЧ-інфекцыі. На Сенненшчыне хоць і не шмат хворых людзей, аднак іх колькасць у апошнія гады павялічылася і дасягнула 6 асоб.
У заключэнне ідэолагі наведаліся ў рэканструяваныя аб’екты грамадскага харчавання райспажыўтаварыства. Яны ўвачавідку змаглі ўбачыць абноўлены інтэр’ер, прадэгуставалі новыя хлебабулачныя вырабы, блюды хуткага прыгатавання.
Любая інфармацыя карысная. А для ідэолага яна яшчэ і падмога ў рабоце. Нездарма ж кажуць, хто валодае інфармацыяй, той валодае светам.
Наш кар.
НА ЗДЫМКУ: пра прадукцыю хлебазавода расказвае Марыя Хвошч, начальнік аддзела прамысловасці райспажыўтаварыства.