Забыць смак хлеба, прыгатаванага па рэцэптах бабуль, сенненцам не дазваляе прадукцыя хлебазавода райспажыўтаварыства
Каля 5 тон хлебабулачных вырабаў у суткі выпякаецца на прадпрыемстве. Акрамя таго, попытам у пакупнікоў карыстаецца дробнаштучная прадукцыя вагой 100-150 грамаў. Каля 40% вырабаў запакоўваецца ў плёнку, што садзейнічае больш працягламу іх захаванню.
— Наша прадукцыя, — расказвае Марыя Хвошч, начальнік аддзела прамысловасці райспажыўтаварыства, — акрамя Сенненскага раёна, пастаўляецца на рэалізацыю ў гандлёвую сетку Віцебска, Оршы, Чашніцкага раёна.
Найбольшым попытам у пакупнікоў карыстаецца хлеб «Зарэчны». Ён узбагачаны бульбяной клятчаткай і, на думку дыетолагаў, садзейнічае зніжэнню вагі. Медыкі рэкамендуюць гэты гатунак хлеба для спажывання людзям, у якіх ёсць сардэчна-сасудзістыя захворванні. Паспелі ацаніць спажыўцы і такія віды хлеба, як «Літоўскі» (0,4 кг), «Славянскі» (0,3 кг) з дабаўленнем вотруб’я, «Клюквенный» — у яго прымешваюцца журавіны. Апошнім часам сталі выпякацца булачка «Малочная», рагалік з павідлам, пляцёнка «Малышка». Яны таксама знайшлі свайго пакупніка, бо складаюцца толькі з натуральных інгрэдыентаў. Больш працягламу захаванню свежасці хлеба садзейнічае шматстадыйны спосаб цеставядзення. Фактычна сенненскія хлебапёкі ў вытворчасці прымяняюць тую ж тэхналогію, што і беларускія гаспадыні, калі самі пяклі хлеб у печах.
Хлеб нашым, і не толькі, народам прызнаецца за святыню, заўважым, не матэрыяльную, а духоўную. Яго прыгатаванне — асаблівы працэс, асаблівая тэхналогія. Важна, каб да працы хлебапёк прыступаў не толькі з чыстымі рукамі, у белым пярэдніку. Якасць, смак і, нават, пажыўнасць хлеба паляпшаюцца, калі яго пякуць шчырыя, спагадлівыя, з адкрытай душой людзі. Такіх і імкнуцца падбіраць у калектыў хлебапёкаў.
— У нас на вытворчасці няма выпадковых людзей. Тыя, хто прыходзіць на хлебакамбінат, застаюцца, — працягвае расказ Марыя Хвошч. Галіна Пашкевіч, майстар-пекар, некалі працавала ў каўбасным цэху. Паспрабавала сябе на хлебапячэнні, і вось ужо каля дзесяці гадоў працуе тут. Не першы год заняты ў вытворчасці хлеба Вольга Аксёнава, Вольга Сіўко, Алеся Коўшар, Ірына Шапавіцкая. Мы назвалі імёны толькі тых людзей, што працуюць у адну з трох змен. Вытворчасць працуе кругласутачна. Усяго ў ёй занята больш за 30 чалавек.
Вытворчасць хлебабулачных вырабаў — рэнтабельная. А значыць яна прыносіць райспажыўтаварыству прыбытак. Чаму спрыяе не толькі сумленная праца людзей, занятых на заводзе. Перыядычна абнаўляецца яго абсталяванне. Самыя значныя ўкладанні былі зроблены пры пераходзе на выкарыстанне для хлебапячэння прыроднага газу. У бліжэйшых планах хлебапёкаў — замена мукапрасейвальнікаў, дазатараў. Гэта дапаможа аблегчыць працу людзей, выжываць у жорсткай канкурэнтнай барацьбе.
Аляксандр ІЎЕЎ.
НА ЗДЫМКУ: Марыя Хвошч (першая справа) разам са зменай майстра-пекара Галіны Пашкевіч у складзе Вольгі Аксёнавай, Вольгі Сіўко, Алесі Коўшар і Ірыны Шапавіцкай.