Стаць піянерам і гурткоўцам будзь гатовы!
Заканчэнне Тыдня пазашкольнага выхавання і навучання, які праходзіў па ўсёй краіне з 4 па 11 верасня, адзначылі гарадскім святам. На летняй танцпляцоўцы сабраліся дзеці, іх бацькі, а таксама настаўнікі, супрацоўнікі Сенненскага цэнтра пазашкольнай работы з дзецьмі і падлеткамі.
Тыдзень пазашкольніка супадае з яшчэ адной знамянальнай датай — Днём нараджэння грамадскага аб’яднання «Беларуская рэспубліканская піянерская арганізацыя». Сёлета ў беларускай піянерыі — юбілей. ГА «БРПА» спаўняецца 20 гадоў. Менавіта столькі Сенненскі ЦПР праводзіць мерапрыемствы, прысвечаныя ўступленню ў рады піянерскай арганізацыі. Гэтае свята не стала выключэннем. На ўрачыстую лінейку выйшлі члены школьных дружын «Брыганціна» (СШ №1), «Вясёлка» (СШ №2), «Вясёлка» (школа-інтэрнат), а таксама пяцікласнікі, якім належала сёння стаць піянерамі. Сёлета ў піянерскія рады ўступілі 66 школьнікаў — навучэнцаў сярэдніх школ №1 і №2 г.Сянно, Сенненскай сярэдняй школы-інтэрната. Услед за дырэктарам ЦПР Валянцінай Каржыцкай хлопчыкі і дзяўчынкі вымавілі словы Прысягі. Завязаць новаспечаным піянерам чырвона-зялёныя гальштукі атрымалі права ветэраны і сённяшнія актывісты піянерскага руху, ганаровыя госці, у іх ліку начальнік аддзела па справах моладзі райвыканкама Марына Наваковіч. Яна таксама павіншавала вучняў з урачыстай падзеяй. Да яе далучыліся старшыя піянерважатыя СШ №2 Вольга Пернер і школы-інтэрната Святлана Даукшас. З юбілейнай нагоды члены школьных дружын — Пётр Труханенка, Ілья Несцяронак, Анастасія Мяцеліца, Ірына Дваравая, Ігар Малахаў, Аляксандра Навасад і Вадзім Мядзведзеў — былі ўзнагароджаны граматамі райсавета піянерскай арганізацыі.
Раптоўна на пляцоўцы з’явіліся дзяўчынкі на роліках. Яны трымалі ў руках гірлянду з рознакаляровых паветраных шарыкаў з надпісам «20 год ГА «БРПА». Пад дзіцячыя апладысменты шарыкі неўзабаве ўзняліся ў неба. На такой радаснай ноце скончылася лінейка, але не само свята.
Месца вядучых заняў казачны герой «Домовёнок-Внешколёнок» у выкананні педагога-выхавацеля ЦПР Алесі Цыва. Разам з кіраўніком Цэнтра Валянцінай Каржыцкай ён расказаў пра дзейнасць роднай установы. Сёлета ЦПР спраўляе паўвекавы юбілей. За 50 год існавання праз арганізацыю прайшло не адно пакаленне сенненцаў. І сёлетнія дзеткі — выхаванцы Цэнтра — маюць цудоўную магчымасць усебакова развівацца, раскрываць свае таленты. Дзеля гэтага тут працуе 14 гурткоў розных накірункаў: тэатральны, спартыўны, вакальны, дэкаратыўна-прыкладнога мастацтва і інш. Дарэчы, прысутныя маглі на свае вочы ўбачыць, што ўмеюць выхаванцы асобных гурткоў. Майстэрства страявой падрыхтоўкі прадэманстравалі хлопцы з ваенна-патрыятычнага атрада «Спарта» (кір. Алег Шумкоў). Прыёмы баявых адзінаборстваў паказалі ўдзельнікі гуртка «Рукапашны бой» (кір. Уладзімір Санько). А дзяўчаткі з «Вакаліны» (кір. Алена Галай) парадавалі ўсіх добрымі песнямі.
Гурткоўцы — актыўныя ўдзельнікі розных конкурсаў і спаборніцтваў, у якіх часта займаюць прызавыя месцы. Многім з іх на свяце былі ўручаны дыпломы. Вікторыя Салодкіна з гуртка «Нашчадкі»(кір.Людміла Крыштопенка) заняла другое месца ў конкурсе сачыненняў «Народжаныя ў Беларусі». Выхаванцы гуртка «Авіясуднамакетаванне» (кір. Алена Польская) Назар Шубка, Арцём Гарнак, Мікіта Бышчаў сталі прызёрамі раённага этапу абласной выставы тэхнічнай творчасці навучэнцаў. Падзякі атрымалі юныя акцёры лялечнага тэатра (кір.Таццяна Лектарава) Андрэй Гарнак, Алена Сянькевіч, Уладзіслаў Малаткоў, якія падчас летніх канікул паказвалі спектаклі для маленькіх жыхароў Сянно і аграгарадка Нямойта, а таксама выступалі ў вясковых школках.
На працягу некалькіх год выхаванцы ЦПР, вучні школ прымаюць удзел у конкурсе дэкаратыўна-прыкладной творчасці і выяўленчага мастацтва «Выратавальнікі вачамі дзяцей», абвешчаным Міністэрствам па надзвычайных сітуацыях. Найбольш актыўныя ўдзельнікі — Марына Грыцаева (СШ №1 г.Сянно), Дзяніс Шабалін (Ульянавіцкая школа), Кацярына Шухто (Машканская школа) — былі заахвочаны. Намеснік начальніка Сенненскага РАНС па ідэалагічнай рабоце і кадравым забеспячэнні Уладзімір Бозыр уручыў падлеткам маляўнічыя часопісы, у якіх, дарэчы, змешчаны ўласныя работы вучняў.
На працягу дзейства супрацоўнікі Цэнтра пазашкольнай работы забаўлялі ўсіх прысутных цікавымі гульнямі і вясёлымі танцамі, ператвараючы суботні ранак у сонечнае свята дзіцячай усмешкі і творчасці.
Вольга Бандарэвіч.
Фота аўтара.