Ветэраны Сенненшчыны атрымаюць грашовую дапамогу
У Беларусі пачаліся выплаты матэрыяльнай дапамогі ветэранам Вялікай Айчыннай вайны.
Яе атрымальнікамі стануць каля 51 тыс. чалавек. На гэтыя мэты выдзелена каля Br260 млрд.
Br10 млн атрымаюць Героі Савецкага Саюза, кавалеры ордэнаў Славы трох ступеняў, Героі Сацыялістычнай Працы, удастоеныя гэтага звання ў гады Вялікай Айчыннай вайны.
Br8 млн выплацяць інвалідам і ўдзельнікам ВАВ, асобам, якія прымалі ўдзел у складзе спецыяльных фарміраванняў у размініраванні тэрыторый і аб’ектаў пасля вызвалення ад нямецкай акупацыі ў 1943 — 1945 гадах.
Br3,5 млн атрымаюць узнагароджаныя ордэнамі ці медалямі СССР за самаадданую працу і бездакорную воінскую службу ў тыле ў гады ВАВ; тыя, хто ўдзельнічаў у будаўніцтве абаронных збудаванняў, ствараў ваенныя аб’екты, абслугоўваў прыфрантавыя ўчасткі жалезных і аўтамабільных дарог; блакаднікі Ленінграда; члены сем’яў вайскоўцаў, партызан і падпольшчыкаў, загінулых ці зніклых без вестак у час баявых дзеянняў у гады вайны; інваліды з дзяцінства з прычыны ранення, кантузіі і калецтва, звязаных з баявымі дзеяннямі ў перыяд ВАВ ці з іх наступствамі; былыя вязні фашысцкіх канцлагераў, турмаў, гета і іншых месцаў прымусовага ўтрымання, створаных фашыстамі і іх саюзнікамі ў гады Другой сусветнай вайны.
Як паведаміла начальнік аддзела пенсій і дапамог упраўлення па працы, занятасці і сацыяльнай абароне райвыканкама Святлана Грамузава, на Сенненшчыне матэрыяльную дапамогу атрымаюць 136 чалавек. У тым ліку па Br8 млн рублёў будзе выплачана 47 інвалідам і ўдзельнікам Вялікай Айчыннай вайны. Атрымальнікамі Br3,5 млн рублёў стануць 89 жыхароў нашага раёна.
Вольга БАНДАРЭВІЧ.