Около 9 тысяч сенненцев приняли участие в республиканском субботнике
Амаль 9 тыс. жыхароў раёна, у тым ліку больш за 2 тыс. школьнікаў і пенсіянераў, прыняло ўдзел у агульнабеларускім суботніку, які сёлета быў прысвечаны 70-годдзю вызвалення краіны ад нямецка-фашысцкіх захопнікаў. Зароблена, па папярэдніх даных, 89,7 млн рублёў, што на 2,7% больш леташняга.
Шмат зроблена па добраўпарадкаванні населеных пунктаў, памятных знакаў, помнікаў, што ўстаноўлены ў гонар салдат-вызваліцеляў, месцаў масавага адпачынку. У райцэнтры, у парку 40-годдзя Перамогі, высадзіўся працоўны дэсант з ліку супрацоўнікаў аддзела адукацыі, спорту і турызму райвыканкама, спартыўнай школы, аддзялення Дэпартамента аховы. Іх намаганнямі ачышчана тэрыторыя, на якой размешчаны спартыўныя збудаванні, праходзяць культурна-масавыя мерапрыемствы. Прыбрана галлё, што засталося ў месцах, дзе выпілаваны старыя дрэвы.
На месцы бальніцы, дзе ў гады Вялікай Айчыннай вайны сенненскія медыкі-падпольшчыкі лячылі раненых байцоў Чырвонай Арміі, разбіты сквер. Ініцыятыву камуністаў раённай арганізацыі КПБ дапамагалі ўвасобіць работнікі РУП ЖКГ. Агульнымі намаганнямі высаджана каля 100 дрэваў. Мяркуецца, што сквер будзе названы ў гонар 70-годдзя вызвалення Беларусі ад фашыстаў.
Рэшткі пабудоў, што засталіся пасля пажару на вуліцы Меліяратараў, па ўласнай ініцыятыве прыбірала група гараджан, арганізаваная на добрую справу Пятром Стычынскім, чалавекам, які некалькі гадоў таму паблізу добраўпарадкаваў такую ж пустэчу. З часам на месцы пажарышча таксама будуць расці дрэвы, упэўнены ён.
У Багушэўску шчыравалі на ўборцы грамадзянскіх могілак. Асабліва прадстаўніча выглядалі «каманды» пасялковых школ, лясгаса, які прадаставіў і неабходную тэхніку. Значная дапамога багушэўцамі была аказана ААТ «Бяленева». Больш за 30 чалавек займаліся пераборкай бульбы.
Вясновыя суботнікі — гэта не толькі савецкая традыцыя, яе вытокі куды глыбей, бо грунтуюцца на ўнутраным імкненні чалавека да прыгажосці, гармоніі з прыродай і навакольным асяроддзем.
Заробленыя на суботніку грошы будуць патрачаны на стварэнне цэнтра звышдакладнай дыягностыкі анкалагічных захворванняў. Але не толькі. Частка грошай пойдзе на іншыя, але таксама грамадскапатрэбныя справы.
Наш кар.
НА ЗДЫМКАХ: удзельнікі суботніка, што пасадзілі сквер на месцы былой бальніцы; праца па ўласнай ініцыятыве.