Дзяжурны рэпарцёр (№89)

 Да канца тыдня ўстановяць
Жыхар вёскі Розмыслава Нямойтаўскага сельсавета Леанід Аўчынка задаецца пытаннем, куды і навошта дарожнікі забралі прыпыначны павільён. Людзі, а галоўнае, дзеці, вымушаны чакаць аўтобус, стоячы на пранізлівым ветры ды пад восеньскім дажджом. Дарэчы, на мінулым тыдні такі ж зварот паступіў на «Дзяжурны рэпарцёр» і ад вяскоўцаў з Дамашэва.
Тады дырэктар ДРБУ-146 адказаў, што павільёны забралі на рамонт. Аднак, па словах жыхароў згаданых населеных пунктаў, яны былі новыя.
Праўда, Дзмітрый Аленчанка паабяцаў, што да канца гэтага тыдня адрамантаваныя павільёны будуць устаноўлены.
Едзе 4 месяцы
У другі раз звяртаецца ў рубрыку і Уладзімір Вараб’ёў з аграгарадка Полымя Беліцкага сельсавета. Яшчэ ў ліпені мужчына цікавіўся, чаму перастаў прыязджаць зубны ўрач. Намеснік галоўнага ўрача УЗ «Сенненская ЦРБ» Марына Сапяжынская тады абяцала, што ў жніўні спецыяліст будзе весці прыём у Беліцкай амбулаторыі. Але на двары лістапад, а ўрач усё яшчэ едзе.
На гэты раз Марына Аркадзьеўна растлумачыла, што паслугі стаматолага не вельмі запатрабаваны ў жыхароў населенага пункта, ды і наяўнае ў амбулаторыі абсталяванне не дазваляе праводзіць паўнацэннае лячэнне. Тым не менш яна запэўніла —спецыяліст  будзе перыядычна наведвацца ў аграгарадок і весці прыём.

Вольга БАНДАРЭВІЧ.