Крэда спецыяліста
Зінаіда Макараўна Машэра ў РУСП імя П.М.Машэрава карыстаецца безумоўным аўтарытэтам, які заслужаны шматгадовай працай у эканамічнай службе гаспадаркі. Пачынала пасля заканчэння Смальянскага сельскагаспадарчага тэхнікума яшчэ ў калгасе імя Энгельса, які пасля стаў асновай для саўгаса, працавала з такімі вядомымі ў раёне і вобласці асобамі, як Мікалай Лявонавіч Цуран, Эдуард Мікалаевіч Герасіменка, Эдуард Міхайлавіч Дзям’янаў. Механізатары, даяркі паважаюць яе, бо многія гады і па сённяшні дзень яна — эканаміст па зарплаце.
— Тут важна, каб чалавек разумеў, бачыў, ад чаго залежыць яго заробак, нельга плаціць незаробленае. Але і лёгкія грошы разбэшчваюць работніка, — так фармулюе сваё крэда спецыяліста Зінаіда Макараўна.
У яе шмат вучняў. Не хаваючыся, перадавала яна свае веды, вопыт Алене Міхайлаўне Дуранковай, цяперашняму галоўнаму эканамісту ўнітарнага сельгаспрадпрыемства. Сёння ў яе вучацца маладыя спецыялісты гаспадаркі Аляксей Разгільдзееў, Таццяна Кацар.
— У маладых таксама ёсць чаму павучыцца,— лічыць Зінаіда Макараўна. І ў гэтым залог яе працоўнага даўгалецця.