ФК “Будаўнік” стаў бронзавым
Па выніках чэмпіянату Віцебскай вобласці па футболе 2012 года Сенненская футбольная каманда «Будаўнік», якая выступала ў першай лізе, заняла трэцяе месца.
Некалькі месяцаў фанаты і проста аматары сачылі за футбольнымі баталіямі, што вяліся паміж камандамі раёнаў вобласці. Урачыстае ўзнагароджанне пераможцаў і прызёраў чэмпіянату нядаўна прайшло ў актавай зале вытворчага рэспубліканскага ўнітарнага прадпрыемства «Віцебскаблгаз». З рук старшыні Віцебскага абласнога грамадскага аб’яднання «Федэрацыя футбола» Пятра Шэршаня кубкі, дыпломы і медалі атрымалі каманды-пераможцы. «Золата» заваявала футбольная каманда СДЮШАР «Дзвіна» (Віцебск), «серабро» дасталася «Экстрыму» (Расоны), «бронза» — ФК «Будаўнік» (Сянно).
На заканчэнне ўрачыстасцей пераможцаў чакаў святочны канцэрт.
Немалы ўклад у развіццё футболу на Сенненшчыне адыгрывае спонсарская дзейнасць УП «Сенненская ПМК-64» і яго дырэктара Аляксандра Блізнюка.
Мы ж будзем з нецярпеннем чакаць наступнага футбольнага чэмпіянату і актыўна балець за нашых хлопцаў з ФК «Будаўнік»!
Ірына ГАРБАЧОВА.