На Сенненшчыне прайшоў рэспубліканскі семінар-нарада з удзелам Міністра сельскай гаспадаркі Рэспублікі Беларусь Леаніда Зайца
10 кастрычніка, Сенненшчына прымала высокіх гасцей.Наш раён быў абраны пляцоўкай для правядзення рэспубліканскага семінара-нарады. Яго ўдзельнікамі сталі прадстаўнікі Міністэрства сельскай гаспадаркі і харчавання Рэспублікі Беларусь, вядучыя навукоўцы ў галіне жывёлагадоўлі, у тым ліку Нацыянальнай акадэміі навук, Віцебскай дзяржаўнай акадэміі ветэрынарнай медыцыны, прадстаўнікі прадпрыемстваў-вытворцаў лекавых прэпаратаў ветэрынарнай медыцыны, а таксама старшыні і намеснікі старшынь камітэтаў па сельскай гаспадарцы і харчаванні, якія курыруюць пытанні жывёлагадоўлі, начальнікі аддзелаў (упраўленняў) ветэрынарыі камітэтаў па сельскай гаспадарцы і харчаванні аблвыканкамаў. Узначаліў семінар-нараду Міністр сельскай гаспадаркі і харчавання Рэспублікі Беларусь Леанід Заяц.
Асаблівая ўвага надавалася пытанням павышэння захаванасці буйной рагатай жывёлы, эфектыўнасці ўзнаўлення грамадскага статка, прымаемым мерам па паляпшэнні якасці малака. Як вырашаюцца яны на практыцы ў Сенненскім раёне, удзельнікі семінара маглі пазнаёміцца падчас наведвання малочна-таварнай фермы «530 н.п. Масоры» ДП «Саўгас імя Машэрава». На базе вядучага ў раёне комплексу вучоныя Віцебскай ветакадэміі правялі майстар-класы па прафілактыцы і лячэнні артапедычных захворванняў у кароў. Таксама да ўвагі спецыялістаў жывёлагадоўчай сферы была прадстаўлена выстава апошніх распрацовак у ветэрынарнай медыцыне буйнейшых айчынных вытворцаў лекавых прэпаратаў ААТ «Белзооветснабпром» і УП «Віцебская біяфабрыка».
Падрабязна пытанні работы жывёлагадоўчай галіны за 9 месяцаў 2012 года і прымаемых мерах па павелічэнні прадукцыі жывёлагадоўлі і павышэнні яе якасці, прафілактыцы захворванняў буйной рагатай жывёлы, падрыхтоўцы жывёлагадоўчых фермаў да ўтрымання жывёлы ў зімова-стойлавы перыяд былі разгледжаны на пленарным пасяджэнні, што прайшло ў вялікай зале раённага выканаўчага камітэта.
Вольга Бандарэвіч.
НА ЗДЫМКУ (злева направа): старшыня райвыканкама В.У. Цапота, генеральны дырэктар РУП «Навукова-практычны цэнтр Нацыянальнай акадэміі навук Беларусі па жывёлагадоўлі» М.А. Папкоў, дырэктар Дэпартамента ветэрынарнага і харчовага нагляду Мінсельгасхарчу В.П. Жукаў, міністр сельскай гаспадаркі і харчавання Рэспублікі Беларусь Л.К. Заяц.
P.S. Больш падрабязна аб праблемах, што ўздымаліся на рэспубліканскім семінары-нарадзе, чытайце ў бліжэйшых нумарах.