Cа студэнцкай лаўкі – на пасаду кіраўніка
Ужо год працуе галоўным бухгалтарам ПП «Дружбінец» віцябчанка Вольга Гетманава (на здымку), выпускніца Беларускай сельгасакадэміі.
Маладая дзяўчына прыехала на Сенненшчыну па размеркаванні. І хоць была магчымасць застацца працаваць у абласным цэнтры ў якасці радавога бухгалтара, Вольга вырашыла рызыкнуць і пайсці на кіруючую пасаду ў тады яшчэ незнаёмае ёй прадпрыемства. Падставы для гэтага і ўпэўненасць у сваіх сілах у дзяўчыны былі.
Па спецыяльнасці «Бухгалтарскі ўлік, аналіз і аўдыт» Вольга закончыла акадэмію з «чырвоным» дыпломам. У час вучобы ўдзельнічала ў шматлікіх спартыўных спаборніцтвах, займалася лёгкай атлетыкай і дзюдо. Была старшынёй жыллёва-бытавой камісіі прафкама студэнтаў, за што атрымлівала імянную стыпендыю Магілёўскага абкама прафсаюза работнікаў АПК. Яе фотаздымак размяшчаўся на Дошцы гонару сельгасакадэміі. У багажы былі і надрукаваныя навуковыя артыкулы, у тым ліку і ў расійскім зборніку. За актыўны ўдзел у грамадскім жыцці Вольга Гетманава ўдастоена звання «Ганаровы выпускнік». Як выдатніца, пабывала ў Мінску на Прэзідэнцкім балі выпускнікоў.
На Сенненшчыне Вользе працаваць падабаецца. Прынялі яе ў Нямойце добра, хоць спачатку не ўсе сур’ёзна ўспрымалі маладога бухгалтара-кіраўніка. Але воля, вытрымка, стараннасць, шырокія тэарэтычныя і камп’ютарныя веды развеялі сумненні як у кіраўніцтва прадпрыемства, так і падначаленых. За год, прызнаецца Вольга, змагла ўнесці значны ўклад у бухгалтарскую справу прадпрыемства, напрыклад, цалкам аўтаматызавала асабісты ўчастак. Вельмі ўдзячна Вольга свайму намесніку Таццяне Кавалеўскай, якая з першых дзён дапамагала маладому спецыялісту, падтрымлівала, заступалася за яе і, безумоўна, усяму бухгалтарскаму калектыву, дырэктару ПП «Дружбінец» Аляксандру Басякову.
Жыве дзяўчына ў Сянне. Па-ранейшаму цікавіцца культурным і спартыўным жыццём. Гуляе ў валейбол, ужо выступала за раён на спаборніцтвах. Удзельнічала і ў мясцовых нямойтаўскіх кірмашах. Расказамі пра вясковыя вяселлі здзіўляе сваіх сяброў-гараджан.
За строгім кіраўніцкім характарам Вольгі праглядваюцца і яўныя дзявочыя «слабінкі».
— Я цаню ў людзях сумленасць, праўдзівасць, дабрыню. Нельга падманваць другога, калі не жадаеш сам быць падманутым. Неразумна крыўдзіцца па дробязях, трэба ўсё дараваць. Нават хлусню і здрадніцтва, — па-хрысціянску філасофствуе Вольга Гетманава.
Сябе Вольга лічыць крыху педантычнай (у рабочых момантах), не падабаецца, калі яе не разумеюць. «У нечым я кар’ерыстка, у тым сэнсе, што пакуль мяне цікавіць кар’ера, праца, таму не спяшаюся выйсці замуж. Я, па натуры, — лідар, са мной складана канкурыраваць. Мала сустракала хлопцаў, якія па-сапраўднаму цікавяць мяне, могуць па-мужчынску адстойваць свой пункт гледжання».
Чым больш размаўляла з Вольгай, тым больш здзіўлялася ёй. Аказваецца, яна — сапраўды меламан. Толькі падабаецца дзяўчыне не замежныя топ-хіты ці «Рукі ўверх», а стары добры рускі рок: «Наўцілус Пампіліус», «ДДТ», «Сплін», «Бі-2», нават, «Кароль і блазан». Слухае яна і «The Prodigy», Мэрліна Мэнсана, Расмуса… Як супрацьлегласць «цяжкай» музыцы — гумарыстычная праграма «Comedi Club», якую любіць глядзець Вольга. Акрамя розных нарматыўных дакументаў, захапляецца творчасцю М.Булгакава, А.Чэхава і інш.
Зазірнуўшы ва ўнутраны свет дзяўчыны, пераканаўшыся ў імкненні ўпарта працаваць, можна з упэўненасцю гаварыць, што Вольга пойдзе па кар’ернай лесвіцы далёка ўверх. На бліжэйшы ж час Вольга Гетманава думае застацца ў раёне і пасля належнага тэрміну адпрацоўкі. А таму застаецца спадзяванне, што на Сенненшчыне дзяўчына знойдзе не толькі любімую справу, але і жаночае шчасце.
Ірына ГАРБАЧОВА