Чарговая тысяча Гарбачова і Васілёнка

Неаднаразовыя пераможцы рэспубліканскіх і абласных спаборніцтваў сярод камбайнераў, пастаянныя ўдзельнікі галоўных хлебаробскіх свят Аляксей Гарбачоў і Уладзімір Васілёнак, механізатары Віцебскай доследнай меліярацыйнай станцыі, і ў сёлетняе жніво адзначыліся намалотам у 1 тысячу тон збожжа. Акрамя таго, на іх рахунку больш за 40 тон рапсу.

 З працоўнай перамогай на днях іх віншавалі начальнік райсельгасхарча Аляксей Дойлін, які ўручыў камбайнерам Падзячныя пісьмы райвыканкама, і прафсаюзныя лідары раёна: Анатоль Ананенка, старшыня раённага аб’яднання прафсаюзаў, Аляксандр Макаранка, старшыня райкама прафсаюза работнікаў АПК. Яны адзначылі працу камбайнераў каштоўнымі падарункамі. Асабісты рахунак механізатараў працягвае папаўняцца. Цырымонія ўшанавання праходзіла на полі, дзе вялася ўборка гарчыцы, на суседніх палетках даспявае яравы рапс.

 У гэтыя дні працягваюць жніво абодва камбайны сельгасарганізацыі, адзін з якіх, дарэчы, эксплуатуецца 13-ы сезон, другі – 14-ы. Ад таго працоўны поспех камбайнераў становіцца яшчэ больш важкім.

 Будзе ў ВДМС і яшчэ адзін тысячнік. Да запаветнай мяжы наблізіўся экіпаж Барыса Гарнака і Віктара Гарнака. Нягледзячы, што ў пачатку сёлетняга жніва іх падвяла тэхніка – выйшаў са строю рухавік камбайна.

 — На шчасце, на складзе быў запасны. Хлопцы таксама пастараліся – ноч працавалі, каб замяніць яго, — расказаў Валерый Кучко, дырэктар ВДМС.

 Аляксандр ЯЎГЕНАЎ.

Фота аўтара.