Гаспадаркі Сенненшчыны выйшлі на фінішную прамую ўборкі зерневых культур.

      На канец тыдня ў грамадскіх сельгасарганізацыях заставалася ўбіраць каля 3 тыс. гектараў збажыны. Па валавым зборы збожжа мінулагодні паказчык ужо пераўзый­дзены. Намалочана больш за 51 тысячу тон збожжа. Мяркуецца, што агульны намалот будзе блізкі да 60 тыс. тон. Гэта не рэкордны для Сенненшчыны паказчык, тым не менш высокі. Асабліва, калі ўлічыць, што ён дасягнуты ва ўмовах прыкметнага скарачэння дзяржаўных датацыі на падтрымку вытворцаў сельгаспрадукцыі. У пачатку вясны сельгасарганізацыі адчувалі востры недахоп азотных угнаенняў, былі хваляванні ў сувязі з бясснежнай зімой, майскай спёкай.

Але прырода ў рэшце рэшт паднесла хлебаробам і прыемны сюрпрыз. Жніво праходзіла фактычна ў ідэальных умовах. Што дазволіла рытмічна весці ўборку, зэканоміць  значныя матэрыяльныя сродкі ў выглядзе паліва, якое меркавалася закупіць для работы сушыльных комплексаў.

Садзейнічала жніву і добрая арганізацыя працы, своечасова і надзейна падрыхтаваныя камбайны. Са 102 машын, якія пачыналі жніво, 100 задзейнічаны ва ўборачным канвееры і зараз. Акрамя таго, парк  камбайнаў за гэты час папоўніўся яшчэ чатырма машынамі. Прадуманая аплата працы камбайнераў мабілізавала людзей на высокаэфектыўную работу, дазваляла зарабляць за змену па 600-700 тыс., а то і 1 млн рублёў. Сваю ролю сыграў своечасовы манеўр збожжаўборачнай тэхнікай. Гэты прыём выкарыстоўваўся ў раёне і летась. Сёлета на жніве  стала правілам, калі сусед дапамагаў суседу. Ад гэтага выйграла справа, а камбайнеры, якія надзейна падрыхтавалі тэхніку, атрымалі магчымасць больш зарабляць.

Тэхніка перакідвалася з арганізацыі ў арганізацыю не толькі на заключным этапе ўборачных работ, а пастаянна, бо азімыя і яравыя зерневыя культуры паспявалі нераўнамерна. У выніку, камбайнеры ААТ «Ульянавічы», якія па тэмпах уборкі азімых лідзіравалі, паспелі папрацаваць і на сваіх палетках і дапамагчы ўбраць збожжа ў ААТ «Сенненскі райаграсэрвіс», «Студзёнка». А вось яшчэ адзін красамоўны прыклад. У ААТ «Бяленева»  самы вялікі ўборачны клін зерневых культур. Быў час, калі гаспадарка прымала дапамогу ад суседзяў. Як толькі дазволіла сітуацыя на палетках, камбайны сельгасарганізацыі накіраваліся на дапамогу СУП «Саўгас імя Машэрава».

Нельга не сказаць пра яшчэ адзін неардынарны для аграрыяў Сенненшчыны факт. У гэтыя дні 6 камбайнаў сельгасарганізацый раёна ўбіраюць хлеб на Талачыншчыне.

Аляксандр  ЯЎГЕНАЎ.