Районный конкурс «Песни юности наших отцов-2019» поддержали студенты

Студэнтка першага курса Беларускага дзяржаўнага ўніверсітэта культуры і мастацтваў Маргарыта Асіран стала пераможцай раённага конкурсу маладых выканаўцаў патрыятычнай песні “Песні юнацтва нашых бацькоў-2019”, прысвечанага Году малой радзімы.

 Больш за дзесяць гадоў фестываль збірае маладых людзей з ліку аматараў і прафесіяналаў з музычнай адукацыяй. За перыяд свайго існавання конкурс паспеў заваяваць папулярнасць і сярод прадстаўнікоў старэйшага пакалення. На гэты раз на сцэну раённага Цэнтра культуры і народнай творчасці выйшлі 13 артыстаў, якія выканалі 26 кампазіцый, што ведаюць на памяць мільёны. Прадставілі па дзве песні добра вядомыя ў 1930-2005 гадах. Першы твор — пра людзей мастацтва, другі — папулярная песня з савецкіх, замежных, у тым ліку расійскіх, кінафільмаў.

 

 Як адзначылі ў журы, з гадамі расце не толькі колькасць удзельнікаў фестывалю, але і іх прафесійны ўзровень. Кожнаму выступленню былі ўласцівы індывідуальнасць, яркасць, творчы каларыт. Яны суправаджаліся відэасюжэтамі або фотазастаўкамі на экране, танцавальнымі нумарамі груп падтрымкі канкурсантаў.

  Шчодрымі апладысментамі гледачы сустракалі Таццяну Лышко, ветурача СУП “Саўгас імя Машэрава”, Аляксандра Мінёнка, супрацоўніка Сенненскага РАНС, Вераніку Казлову, настаўніцу Машканскай ДССШ, дзяўчат з РУП ЖКГ і іншых.

 Для Маргарыты Асіран, пераможцы фестывалю, удзельнічаць у музычных мерапрыемствах звыклая справа. Выпускніца Машканскай дзіцячай школы мастацтваў па класу фартэпіяна неаднаразова заяўляла пра сябе ў раённым фестывалі “Ранішняя зорка”.

 Другое месца атрымала Ганна Васільева, якая прадстаўляла Багушэўскі Дом культуры. Нягледзячы на тое, што жыццё канкурсантка непарыўна звязана з абласным цэнтрам — яна вучыцца ў Віцебскім медыцынскім каледжы – дзяўчына знайшла час, каб паўдзельнічаць у конкурсе. Па словах Ганны, спевы яе любімы занятак. На жаль, часу на яго не хапае. Таму займаецца ў сольным гуртку пры гарпасялковым Доме культуры толькі калі прыязджае да бацькоў. Ганна валодае не толькі добрым вакалам, але і навыкамі ігры на цымбалах, чаму навучылі ў Багушэўскай дзіцячай школе мастацтваў.

 Трэцяе месца заняла прадстаўніца сектара спорту і турызму райвыканкама — Анастасія Распорская. Дырэктар ФСК “Алімп” даказала, што і ў сферы фізічнай культуры таксама ёсць творчыя людзі.

 Прыз глядацкіх сімпатый, які быў зацверджаны ў мінулым годзе, атрымала Кацярына Барсукова, супрацоўніца аддзялення дзённага знаходжання для інвалідаў ТЦСАН.

 Пераможцы конкурсу былі ўзнагароджаны дыпломамі і каштоўнымі падарункамі — ад арганізатараў фестывалю аддзела ідэалагічнай работы, культуры і па справах моладзі райвыканкама.

Ала ЯКАЎЛЕВА.